İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 143 Hüküm no: 100 Orijinal metin no: [48-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağzade Vakfı Odalarında sakin iken sürgün edilen Rukıye’nin evinde bulunan eşyasının Mustafa’ya teslim olunması Alipaşa mahâllesinde sâkine olup bundan akdem nefy olunan İhsan kızı Rukıye’nin eşyâsı Mustafa’ya teslîm Ma‘rûz, Vârid olan fermân-ı âlîlerine imtisâlen kıbel-i şer‘-i şerîfden irsâl olunan Numan Efendi dâ‘îleri mahmiye-i İstanbul’da Zincirlikuyu kurbünde Alipaşa-i atik mahâllesinde Debbâğzâde Vakfı Odaları derûnunda vâki‘ sâhib-i arzuhâl Mustafa’nın müşâhereten müsteciresi olan İhsan kızı demekle ma‘rûfe ve yirmi beş gün mukaddem diyâr-ı âhara bâ-fermân-ı âlî nefy olunan Rukıye’nin sâkine olduğu menzile varıp huzûr-ı Müslimînde akdeylediği meclis-i şer‘-i şerîfde sâhib-i arzuhâlin inhâsı nefsü’l-emre muvâfık olduğu mahâllesi imamı vekîli Mehmed Emin Efendi ve müezzini Molla Ahmed ve ahâlîsinden Kırkiki Bölüğün Çorbacısı Ali Ağa b. Mehmed ve Doğramacı Mehmed Çelebi ve derzi el-Hâc Mustafa Çelebi ve Çukadâr Hasan ve Bekçi Hasan Beşe ve Mehmed Efendi ve Mekteb Hocası es-Seyyid Mehmed Efendi nâm kimesneler ba‘de’l-ihbâr menzil-i mezkûr zelzeleden harâba müşrif olup içinde mevcûde ve mezbûre Rukıye’nin eşyâsı tahrîr ve bir kimesneye teslîm olunmak iktizâ etmekle ahâlî-i mezbûrûn muvâcehelerinde mezbûrenin eşyâsı olmak üzere menzil-i mezkûrda zuhûr eden iki memlû yemenî yasdık ve üç memlû minder ve bir alaca minder ve bir şayak köhne mak‘ad ve iki çarşeb ve bir döşek şiltesi ve bir köhne yorgan ve bir çuval ve bir tennûr ve bir mangal tahtası ve bir seped sandık ve bir tahta sandık ve bir câmeşûy sepedi ve bir mendil ve iki billûr kâse ve bir köhne Mısır hasırı ve bir mikrâs ve otuz yedi aded üskülü ve kırk dört aded yeşil ve kırmızı sırça taşı ve bir şikest ayna ve bir sagīr ayna ve bir işkenbe fânusu ve bir köhne beyaz kavuk örtüsü ve bir tonbak sâ‘at kösteği parçası ve bir beyaz bez parçası ve üç yeşil çanak ve bir pirinç kabzalı hamam iskemlesi ve birer akçelik altı aded mum ve bir çeki mikdârı hatab ve iki silme tütün çubuğu ve bir mikdâr ketenini tahrîr ve ahâlî-i mezbûrûn re’yleriyle sâhib-i arzuhâl mezbûr Mustafa’ya teslîm olunduğunu mezbûr dâ‘îleri mahâllinde ba‘de’t-tahrîr ümenâdan Muhzır İbrahim ve Çukadâr Mustafa ile gelip inhâ eylediği huzûr-ı âlîlerine i‘lâm olundu. Fî 21 min-Zilhicce sene 1179.