İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 148 Hüküm no: 103 Orijinal metin no: [51-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zülfikar Efendi Vakfı mütevellisi İbrahim’in, Dimitri’nin elindeki vakfa ait menzil hisselerini taleb etmesi Mîrahor mahâllesinde Zülfikar Efendi Vakfı’ndan keşf-i menzil Ma‘rûz, İslambol’da Nezâret-i dâ‘îlerinde olan evkāfdan Yedikule kurbünde Mîrahor mahâllesinde vâki‘ Zülfikar Efendi Vakfı’nın hâlâ mütevellîsi olan sâhib-i arzuhâl İbrahim Bey b. İsmail meclis-i şer‘-i hatîrde vakf-ı mezkûr müsakkafâtından zikri âtî menzile vâzı‘ü’l-yed olan derûn-ı arzuhâlde ismi merkūm Dimitri v. Dimo mahzarında mahâlle-i mezbûrede vâki‘ bir tarafdan İnce menzili ve bir tarafdan Yanaki bahçesi ve ba‘zan Anaştaş menzili ve tarîk-i âm ile mahdûd yüz on zirâ‘ arsa üzerinde mebnâ ma‘lûmü’l-müştemilât menzil işbu merkūm Dimitri yedinde olan vakıf temessükü mantûkunca altmış altı Şa‘bânı’nın on beşinde icâre-i müeccele ile diğer Dimitri ve Gevheriye nâm zevcânın ale’l-iştirâki’s-seviy tasarruflarında iken merkūm diğer Dimitri hâlik olmağla nısf-ı şâyi‘i evlâdı Kostanti ve Panayot ve Yanaki ve Maryora’ya intikāl eyledikden sonra merkūme Maryora sekiz sehmden bir sehim hissesini el-Hâc Ahmed nâm kimesneye ferâgat ve altmış sekiz târîhinde merkūm Yanaki dahi sihâm-ı mezbûreden kezâlik bir sehmini mezbûr el-Hâc Ahmed’e ba‘de’l-ferâğ mezbûr el-Hâc Ahmed dahi aldığı iki sehm-i şâyi‘ini ve evlâd-ı mezkûreden merkūm Kostanti İslâm’a gelip ismi Yusuf ta‘yîn olundukdan sonra mezbûr mühtedî Yusuf dahi bir sehm-i şâyi‘ini ve yine evlâd-ı mezkûrdan merkūm Panayot bir sehm-i şâyi‘ini ki cem‘an dört sehm-i şâyi‘lerini işbu merkūm Dimitri’ye yetmiş târîhinde ferâgat, ol dahi yetmiş dört târîhinde Mehmed b. Ali’ye ba‘de’l-ferâğ yine mezbûr Mehmed merkūm Dimitri’ye ferâaat etmekle sekiz sehmden dört sehmi merkūm Dimitri’nin üzerinde ve nısfı olan dört sehmi bâlâda tahrîr olunan zevce-i mezbûre Gevheriye’nin üzerinde iken bu esnâda hâlik olmağla mahlûl ve taraf-ı vakfa âid olmuş iken işbu merkūm Dimitri mecmû‘una kendinin olmak zu‘muyla vaz‘-ı yed eder. Suâl olunup menzil-i mezkûrun sekiz sehmden nısfı olan dört sehminden merkūm Dimitri’nin kasr-ı yedine tenbîh olunmak bi’t-tevliye matlûbumdur deyü da‘vâ ve mezbûr Dimitri cevâbında menzil-i mezkûr an-aslin zevcân-ı mezbûrân diğer Dimitri ve Gevheriye’nin ale’l-iştirâk tasarruflarında olduğunu ve ba‘dehû mecmû‘u sekiz sehim i‘tibârıyla nısfı olan dört sehim merkūm Dimitri’nin hissesi tedâvül-i eyâdî ile üzerine geçdiğini ve hudûd-ı mezkûre derûnunda olup bâlâda mezkûr menzilin arsa ve ebniyesinin mecmû‘u hâlâ tasarrufunda olduğunu ikrâr u i‘tirâf edip lâkin merkūme Gevheriye’nin nısf hissesi hâlâ hudûd-ı mezkûre ile mahdûde olan menzilden ifrâz olunmuş idi deyü eylediği def‘ şer‘an mesmû‘a olmamağla ikrârı mûcebince menzil-i mahdûd-ı mezkûrun nısfı olan sekiz sehmden dört sehm-i şâyi‘inden kasr-ı yed ve mütevellî-yi mezbûra teslîm iktizâ eylediğinden mâ‘adâ sâdır olan fermân-ı âlîlerine imtisâlen kıbel-i şer‘-i şerîfden keşif nâibimiz Seyyid Halil Efendi irsâl, ol dahi hâssa mi‘mârlarından İsmail ve Ahmed Halîfeler ile menzil-i mezkûra varıp mütevellî-yi mezbûr ve merkūm Dimitri muvâcehelerinde menzil-i mezkûru tahdîd ve misâha eylediklerinde zikr olunan hudûd ile mahdûd olup yüz elli bir zirâ‘ gelmekle merkūme Gevheriye’nin hıssesi ifrâz olunmayıp hâlâ menzil-i mezkûrda mevcûd olduğunu mahâllinde tahrîr ve gelip inhâ etmekle menzil-i mezkûrun nısf-ı şâyi‘inden kasr-ı yed ve mütevellî-i mezbûra teslîm merkūm Dimitri’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 5 min-Zilhicce sene 1179. Beyaz sahîh