İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 153 Hüküm no: 109 Orijinal metin no: [54-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Deprem nedeniyle ağır hasar gören binaların yıktırılarak halka zararının önlenmesi Mâil-i inhidâm olan mahâlli hedm buyruldu. İstanbul Kādısı Fazîletlü Efendi ve İzzetlü Yeniçeri Ağası ve Haremeyn ve Evkāf Müfettişleri Efendiler Vukū‘ bulan zelzele-i şedîdeden müteessir olan kârgîr han ve dekâkîn ve minârelerden ba‘zıları memerr-i nâsda müşrif-i inhidâm ve indirâs ve civârlarında olanlara mûceb-i ru‘b ve hirâs olmakdan nâşî o makūle mahûf olan ebniyenin hatar üzere olan mahâlleri ashâbına hedm etdirilmek civârında olanların ve mürûr ve ubûr edenlerin bâ‘is-i emn ü rahatı olmağla imdi her ne mahâlde o makūle ibâda mazarrâtı melhûz ebniye var ise masârıf-ı hedmleri mutasarrıfları taraflarından rü’yet olunmak üzere bir gün evvel hedm etdirmelerini lâzım gelenlere gereği gibi tenbîh ve te’kîd eyleyesin deyü [buyruldu]. Fî 14 Z sene [11]79.