İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 152 Hüküm no: 108 Orijinal metin no: [54-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hademe, içağası, çukadar, esnaf, Yahudi ve Hıristiyanlar ile sair sıradan halkın kakum ve vaşak kürk giymemeleri hususunda uyarılmaları Kākum ve Vaşak kürk iktisâsı men‘ Bâ-sah İstanbul kādısı fazîletlü efendi Ez-kadîm envâ‘ fervede kākum ve vaşak kürk iktisâsı vüzerâ-yı izâm ve ulemâ-yı kirâm ve mir-i mîrân-ı zîşân ve ricâl-i Devlet-i aliyye ve hâcegân-ı sadâkat-bünyâna muhtas olup âhad-ı nâs ve esnâf makūlelerine iktisâları mugāyir-i kānûn-ı kadîm iken bir müddetden beri ba‘zı mübezzirîn ve süfehâ nâ-marzî harekete ictirâ ve onları gören sâir nâs dahi süfehâ-yı mezbûrenin eserlerine iktifâ ve refte refte hademe ve iç ağası ve esnâf zümreleri husûsan Yahûd ve Nasârâ tâifeleri kākum ve vaşak kürk iktisâsına cesâret eyledikleri re’yü’l-ayn müşâhede olundukda bu misillü had-nâşinâsların cesâret eyledikleri eşrâf ve tebzîrden mübâ‘adetleri zımnında min-ba‘d hademe ve içağası ve esnâf zümresi ve Yahûd ve Nasârâ tâifesi kākum ve vaşak kürkler giymemeleri için hatt-ı hümâyûn-ı şevket-makrûn-ı şeref-bahş-ı sudûr olup ve mûcebince fermân-ı âlî dahi tasdîr olunmuşken bu esnâda süfehâ-yı merkūme tavr-ı kadîmlerini icrâya mübâderet ve nîmten ve biniş kākum ve vaşak kürkler iktisâsına cüret eyledikleri sahîhan haber verilip kemâ-fi’l-evvel men‘ ü def‘leri ve hilâf-ı fermân-ı âlî hareketden tahzîrleri ve mütenebbih olmayanların gereği gibi te’dîb ve gûş-mâlleri mühim ve muktezî olmağla imdi mahâlle imamları ve esnâf kethüdâları ve Rum ve Ermeni Patrikleri ve Yahûd tâifesinin hahamlarını huzûrunuza ihzâr ve cümlesine ferden ferdâ mazmûn-ı emr-i âlîyi tenbîh ve te’kîd ve gereği gibi zecr ü tehdîd ederek fî-mâ-ba‘d içağası ve Çukadâr ve gürûh-ı esnâf ve Yahûd ve Nasârâ tâifeleri nîmten ve biniş kākum ve vaşak kürkler giymemek ve her kim hilâf-ı fermân-ı hümâyûn hareket eder ise ahz u te’dîb olunacakları tefhîm ve tenbîh ve te’kîde mübâderet eyleyip mazmûn-ı buyruldu ile amel ve hareket eyleyesiz deyü [buyruldu]. Fî 8 Z sene 1179.