İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 154 Hüküm no: 112 Orijinal metin no: [55-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersane-i amire’den ekmekçi esnafına verilen hınta bedellerinin tahsil olunması Habbâzân tâifesine Tersâne’den verilen hınta akçesi tahsîl için buyruldu. Bâ-sah İstanbul kādısı fazîletlü efendi Habbâz tâifesine Tersâne-i âmire’den vakt-i muzâyakalarında verilen mîrî hınta bahasından hâlâ zimmetlerinde altı yüz otuz kîseden mütecâviz akçe olduğu mevkūfâtdan ihrâc olunup sinîn-i sâbıkāda bu esnâlarda tâife-i mezbûrenin zimmetleri ba‘zan iki yüz ve ba‘zan üç yüz kîse bulunur iken bu mertebe külliyetli zimmetleri zuhûr etmesi tama‘a binâen edâsında mümâtale ve nizâm ustalarının ve sâir memûr olanların müsâmahalarından neş’et eylediği zâhir ve te’vîne istihkākları bâhir olup el-hâletü hâzihi mübâya‘a-i cedîde için memûr kılınacak mübâya‘acılara ale’l-hesâb peşîn verilmek üzere külliyetli akçeye muhtâc olmağla imdi nizâm ustaları ve sâir iktizâ edenleri getirdip mâl-ı mîrîden ticâret dâ‘iyesiyle bu gûne hîle ve desîseden ferâgat ve bi-mennihî te‘âlâ yirmi güne dek meblağ-ı mezbûrun dört yüz kîsesini teslîme müsâra‘at eylemelerini muhkem tenbîh ve zimmetlerini edâda tehâvün edenlerin haklarından gelinmek için isim ve resimleriyle i‘lâm ve bu bâbda mikdâr-ı zerre müsâmaha ve iğmâzdan tevakkī ve ihtirâz eylemelerini te’kîd ve ifhâm eyleyesin deyü [buyruldu]. Fî 16 Z sene [11]79.