İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 157 Hüküm no: 117 Orijinal metin no: [57-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Ahmed’in İstanbul Gümrüğü’nden aldığı paraya hiç kimse tarafından müdahale olunmaması İslambol Gümrüğü’nden yirmi akçe yevmiye Ma‘rûz, Donanma-i hümâyûn kalyonları ağalığından mütekā‘id arzuhâl eden ihtiyâr Yusuf b. Ahmed Çarşamba günü arz odasında ma‘kūd meclis-i şer‘-i şerîfde derûn-ı arzuhâlde mezkûr Süleyman b. Mehmed’den beş sene mukaddem ben hasta olduğumda mezbûr Süleyman İslambol Gümrüğü’nden olan yirmi akçe ulûfem için bana ver sıhhat bulduğunda yine sana vereyim diyerek bana yüz elli guruş verip üzerimden ulûfemi almağla hâlâ taleb ederim deyü iddi‘â ol dahi cevâbında, mezbûr Yusuf ulûfe-i mezbûreyi benden makbûzu olan yüz elli guruş mukābelesinde bana ferâğ, ben dahi Kebabcı Ali nâm kimesneye yüz altmış guruşa ferâgat etmiş idim deyü ba‘dehû mezbûr Ali dahi ol gün dîvân-ı âlîde ma‘kūd meclis-i şer‘-i şerîfe ihzâr ve istintâk olundukda ol dahi ulûfe-i mezkûreyi ismi ma‘lûmum olmayan bir kimesneye ferâgat etmişdim deyüp lâkin mezbûr Yusuf’un âhar arzuhâlinde derkenâr olunduğu vech üzere ulûfe-i mezkûre hâlâ mezbûr Yusuf ismine üzerinde olup İslambol Gümrüğü’nden Bursa Mîzân-ı Harîri Mukāta‘asına nakil olunmağla tağyîr ve tebdîl olunmayıp mezbûr Ali, Yusuf ismine okunup ulûfe-i mezkûreyi alıp mezbûr Yusuf’a gadr etmekle derkenâr-ı mezkûr mûcebince fî-mâ-ba‘d mezbûrân Süleyman ve Ali ve âhar kimesne mezbûr Yusuf’un ulûfesine dahl ü ta‘arruz etmeyip bi’z-zât kendi alıp mutasarrıf olmak üzere fermân-ı âlîleri sudûrunda emr ü fermân hazret-i men-lehü’l-emrindir. Fî 19 min-Z sene 1179.