İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 156 Hüküm no: 116 Orijinal metin no: [56-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde zarar gören dükkânlar ile sokak kemerleri ve çatıların tamir olunması Çarşı kemerleri münhedim oldukda mîrîden binâ olunmak üzere Ma‘rûz, Mukaddemâ çarşı muhterik oldukda sokaklarının kemerleri cânib-i mîrîden ve asıl dükkânların masrafı ashâbı taraflarından verilmek üzere nizâm verilip ta‘yîn olunan binâ emîni ma‘rifetiyle binâ etdirilmekle bu def‘a dahi zelzeleden münhedim olan sokak kemerlerinin masrafı lütfen ve inâyeten cânib-i mülûkâneden verilmesine müsâ‘ade-i aliyye-i hüsrevânî erzânî buyrulduğunu mübeşşir sâdır olan fermân-ı âlîye imtisâlen Haffâflar Kethüdâsı el-Hâc İsmail ve Yağlıkçılar Kethüdâsı el-Hâc Osman ve Yorgancılar Kethüdâsı el-Hâc Mehmed ve Kazzâzlar Kethüdâsı el-Hâc Süleyman ve Mûytâblar Kethüdâsı el-Hâc Mustafa ve Sipah Çarşısı Kethüdâsı es-Seyyid Mehmed tarafından vekîli Mehmed ve Tâcirler Kethüdâsı Mustafa ve Fesciler Kethüdâsı el-Hâc Süleyman ve Çadırcılar Kethüdâsı Süleyman ve Abacılar Kethüdâsı Ömer ve Arakiyeciler Kethüdâsı Mustafa ve Bitpazarı Kethüdâsı el-Hâc Mustafa ve Kuyumcular Çarşısı Kethüdâsı Vekîli Memiş ve İneciler Kethüdâsı el-Hâc Abdullah ve Terziler Kethüdâsı İsmail ve Kalpakçılar Kethüdâsı Kostanti ve Çukacılar Ustabaşısı Corci ve Yahûd Ustabaşısı Avram meclis-i şer‘-i şerîfe ihzâr ve mazmûn-ı emr-i âlî üzere bi-mennihî te‘âlâ cümle münhedim olanlar binâ olunup keşfolundukdan sonra ancak dükkân ve odalarının masrafları ashâbı taraflarından verilmek üzere her kesin hissesi hesâb ve tahsîl olunması irâde buyrulduğu tebşîr ve tefhîm olundukda [57] cümlesi râzılar olup devâm-ı devlet-i hazret-i cihândârîye sıdk-ı derûniyle du‘â ve izhâr-ı meserret ve safâ eyleyip, ve sâir mevcûd bulunan ashâb-ı dekâkîn dahi pek ziyâde hamd ü senâ olup merkūm kethüdâlar dahi hâzır olmayanlarına tefhîm ve tebşîre müte‘ahhid olduklarından sonra sokak kemerleri ve dükkânları harâb olmayanlarının ba‘zısının sukūf ve kubâbı münşak olup ve ba‘zısının kiremidlerine ihtilâl gelmek ile eğer bu esnâda bârân vâki‘ olursa şukûk-ı sukūfu muzâ‘af ve belki ba‘zıları külliyen münhedim ve telef olup derûnlarında olan emti‘âmız dahi zarâr ihtimâli olmağla yine kezâlik masrafları ashâbı üzerine olmak üzere sukūfun ta‘mîri takdîmi niyâzında oldukları iltimâslarıyla huzûr-ı âlîlerine i‘lâm olundu. Fî 20 Z sene [11]79.