İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 158 Hüküm no: 119 Orijinal metin no: [57-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Togodoş v. Yani’nin Dimitri aleyhindeki tarla davasının mahkemece görüşülemeyeceği Dimitri’den Kasdina nâm karyede olan tarla da‘vâsı mesmû‘ değildir. Ma‘rûz, Rumeli’de Yenişehir kazâsına muzâfe Ağrefe nâm nâhiyesine tâbi‘ Kasdina nâm karye ahâlîsinden olup mahmiye-i İslambol’da bakkāl hâmil-i arzuhâl Togodoş mahmiye-i mezbûrede meclis-i şer‘-i hatîrde karye-i mezbûre arazisinden etrâf-ı [58] erba‘ası Kouna tarlası ve orman ve tarîk-i âm ile mahdûd yirmi dönüm tarlaya ikrârıyla vaz‘-ı yedi mütehakkık olan hasmı Dimitri nâm zimmî ile terâfu‘larında zikr olunan tarla babam Yani zimmînin sâhib-i arz temessüküyle üzerinde iken işbu yedimde olan hüccet mantûkunca bir ay mukaddem babam mezbûrdan yetmiş beş guruş bedel-i medfû‘ mukābelesinde tefevvüz etmekle merkūm Dimitri fuzûlî vaz‘-ı yed eder deyü da‘vâ edip lâkin arazi-i mîrîye intikāli sâhib-i arz iznine mevkūf ve da‘vâsında dahi huzûru lâzım olmağla vech-i meşrûh üzere merkūm Togodoş’un da‘vâsı mesmû‘a olmayıp babası merkūm ile sâhib-i arz huzûrunda murâfa‘aya mevkūf olduğu bi’l-iltimâs huzûr-ı âlîlerine i‘lâm olundu. Fî 21 Z sene [11]79.