İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 159 Hüküm no: 120 Orijinal metin no: [58-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde yıkılmış olan fırınların yangına dayanıklı olacak şekilde yeniden inşa edilmesi Münhedim olan fırınlar harîkden masûn olacak sûretde binâ olunması için buyruldu ve i‘lâm. Bâ-sah İstanbul kādısı fazîletlü efendi Husûs-ı mezbûru mi‘mâr ağa ma‘rifetiyle rü’yet ve bir gün evvel binâları muktezî ebniyeden olup ve an-aslin kârgîr binâları harîkden ihtirâzen olmağla mahzûr-ı mezbûrdan sâlim olacak vechile binâlarına nizâm verip i‘lâm eyleyesin deyü [buyruldu]. Fî 20 Za sene [11]79 Ma‘rûz, Sâdır olan fermân-ı âlîye imtisâlen ashâb-ı arzuhâlin taht-ı icârelerinde ve tasarruflarında olup zelzeleden müteessir ve harâb olan ekmekçi fırınlarının kârgîr mahâlleri husûsu için mi‘mâr Ağa kulları ma‘rifetiyle rü’yet ve harîk mahzûrundan sâlim olacak vechile binâ etdirilmesi için istişâre ve müzâkere olundukda eğer kârgîr olan mahâllerinin ittisâlinde ahşabdan masnû‘ binâ var ise ol tarafda olan saçağın kirişleri ol binaya muttasıl olsa harîk vukū‘unda tecâvüz ve sirâyet ihtimâli olmağla ikisi beynine havâle duvarı gibi iki zirâ‘ mikdârı kârgîr duvar yapılıp eğer sakfının bir tarafı kalkan olmak iktizâ ederse yine ol tarafın sakfından taşrasına dek kârgîr duvar yapılıp sâir açık mahâlde olan saçakları tuğla ve horasan ile masnû‘ kirpi saçak olmak üzere binâ olunursa mahzûr-ı mezkûr indifâ‘ına medâr-ı küllî olduğuna ittifâk olunmağla zikr olunan fırınları mutasarrıfları ber-vech-i meşrûh binâ eylemeleri bâbında mi‘mâr ağa kullarına hitâben fermân-ı âlî sudûrunda emr ü fermân hazret-i men-lehü’l-emrindir. Fî 22 Z sene [11]79.