İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 168 Hüküm no: 133 Orijinal metin no: [64-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğdanlı Yuvan’ın, iltizam bedelinden olan alacağının ödenmesi hususunda Antoyaki’ye tenbihte bulunulması Boğdan Zâbiti hukūk 1000 guruş Ma‘rûz, Arzuhâl eden Boğdanlı Yuvan v. Todori nâm Boyar Çarşamba günü arz odasında huzûr-ı âlîde ma‘kūd meclis-i şer‘-i şerîfde Canto oğlu Antoyaki nâm zimmî ile terâfu‘larında yetmiş yedi senesinde Eflak’da İstefan nâm voyvoda tarafından Teraverman Mukāta‘ası’nda ben âmil iken mesfûr voyvoda hâlik olup işbu merkūm Antoyaki voyvoda-i mesfûrun kethüdâsı ve başboyar olmağla kāimmakāmlık nâmıyla umûr-ı Eflak’ı müstakillen idâre eder olduğu hâlde yeni voyvoda geldikde akçe lâzımdır deyü benden peşîn akçe isteyip ve mukāta‘a-i mezkûre mahsûlâtına bi-şarti’r-rücû‘ emriyle malımdan adamım İstefan nâm zimmî yediyle Bükreş’de sarrâfı olan Kostanti zimmîye sene-i mezbûre Şa‘bânı’nın on beşinci günü beyaz akçe on bin yedi yüz elli guruş teslîm edip hattâ merkūm Antoyaki sene-i mezbûre Ramazanı’nın yirmi beşinci ve yirmi altıncı günü Bükreş’de Korta ta‘bîr olunur menzilde mecâlis-i adîdede meblağ-ı mezkûr on bin yedi yüz elli guruşumu mukāta‘a-i mezkûre için ber-vech-i muharrer peşîn alıp borcumdur deyü benden ahz ve istihlâkin ikrâr ve işhâd dahi etmiş iken merkūm Antoyaki beni azl ve bana mukāta‘a-i mezkûreyi zabt etdirmeyip âhara ilzâm etmekle medfû‘um olan meblağ-ı mezkûr on bin yedi yüz elli guruşu istirdâd ederim deyü da‘vâ ve merkūm Antoyaki cevâbında zikr olunan mukāta‘ayı müdde‘î-i mesfûra ilzâm edip ve altmış gün zabt etmiş iken ahâlîsi mezbûrdan iştikâ etmeleriyle azledip yerine âharı irsâl etmiş idim ve mukāta‘a-i mezkûre malından benden da‘vâ eylediği mikdâr meblağ tahsîl eyledi deyü takrîr ve vech-i meşrûh üzere müdde‘î-i mezbûrun malından on bin yedi yüz elli guruşu peşîn ahz ve istihlâkini bi’l-külliye inkâr etmekle müdde‘î-i mezbûr merkūm Antoyaki’nin ikrâr-ı meşrûhunu ol târîhde bi’l-maslaha mahâll-i mezkûrde bulunup hâlâ Mollagürânî’de attâr olan Memiş Ağa Kilârcısı demekle ma‘rûf Ömer b. Hüseyin ve Haydarpaşa’da sâkin Birinci Bölük Kapıkethüdâsı es-Seyyid Ahmed b. Ali nâm kimesneleri ikāme, onlar dahi merkūm Antoyaki’nin ikrâr-ı meşrûhuna edâ-yı şehâdet-i şer‘iyye edip tezkiyeleri için kıbel-i şer‘-i enverden Mehmed Emin Efendi irsâl, ol dahi şâhidân-ı mezbûrânın mahâllerine varıp es-Seyyid Makbûlî Dede ve Za‘îm Mahmud Ağa ve Kâtib es-Seyyid Attâr İsmail ve Derviş Yahya ve el-Hâc Mehmed ve Abdülkadir ve Berber Mustafa ve Başçukadâr Mehmed ve Hasan Efendi ve Mehmed Ağa ve Berber Mehmed ve Haraccıoğlu Mehmed ve Berber Hasan ve Ekmekçi Ahmed Beşe ve Çukadâr Mehmed ve Berber Molla Ahmed ve Çukadâr Salih ve Attâr Mehmed ve Haffâf Süleyman nâm yirmi nefer kimesnelerden keyfiyet-i hâllerini suâl etdikde her biri kizb ile ma‘rûf olmayıp udûlden olduklarını haber vermeleriyle şehâdetleri şer‘an makbûle olmağın mûcebiyle mesfûr Antoyaki’nin müdde‘î-i merkūmdan me’hûz ve müstehleki olan on bin yedi yüz elli guruşun edâsına tenbîh-i şer‘î olunduğu mübâşiri İbrahim Çavuş kulları iltimâsıyla huzûr-ı âlîlerine i‘lâm olundu. Fî 29 Zilhicce sene 1179.