İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 168 Hüküm no: 132 Orijinal metin no: [63-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremden zarar gördüğü belirtilen Balat Hamamı’nda mimarlar tarafından hasar tespiti yapılması Vukū‘ bulan zelzelede Balat hamamı keşif Ma‘rûz, Arzuhâlde mezkûr Balat Hamamı’na zelzeleden vehn gelmekle isti‘mâli mahûf olduğu ecilden ta‘mîr olunsun deyü etrâfında olan kimesnelerin iştikâlarına binâen hamamcısı inhâsıyla vârid olan fermân-ı âlîlerine imtisâlen kıbel-i şer‘-i şerîfden Numan Efendi dâ‘îleri irsâl, ol dahi hâssa mi‘mârlarından İsmail ve Ahmed ile hamam-ı mezkûra varıp ahâlî-i mahâlleden İmam Davud Efendi ve Müezzin’i Molla Osman ve Eyyûb Ağa ve Haffâf el-Hâc İsmail ve Haffâf Abdurrahman ve Mehmed Efendi ve Molla Abdullah ve Mataracı el-Hâc Hasan ve Berber el-Hâc Mahmud ve Eskici İbrahim Çelebi ve Camcı Süleyman Beşe ve Uncu Ahmed Ağa ve el-Hâc Osman ve Mehmed Emin nâm kimesneler muvâcehelerinde hamam-ı mezkûru mu‘âyene eylediklerinde ancak câmekânında pencere ittisâlinde tûlen beş zirâ‘ olan duvarı ta‘mîre muhtâc olup sâir derûn ve bîrûnunda ta‘mîre muhtâc mahâlli olmadığı mi‘mârân-ı mezbûrân bi’l-müşâhede ihbâr eylediklerinde mezbûr dâ‘îleri mahâllinde tahrîr ve ümenâ-yı şer‘le gelip inhâ eylediği bi’l-iltimâs huzûr-ı âlîlerine i‘lâm olundu. Fî 22 min-Zilhicce sene 1179.