.:: İstanbul Kadı Sicilleri ::.


İstanbul Mahkemesi 25 Numaralı Sicil (H. 1179-1180 / M. 1765-1767)
cilt: 76, sayfa: 170
Hüküm no: 135
Orijinal metin no: [65-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Osman b. Ahmed’in vekaleten elinde bulunan bez ve gömlekleri sahiplerine teslim etmesi

Bürüncük ve keten bezi da‘vâ

Ma‘rûz,

Ashâb-ı arzuhâlden vech-i âtî üzere yalın kat beş top bürüncük bez ile yalın kat bürüncük gömlek ve iki kat üç bürüncük gömlek ve üç zirâ‘ hilâlî bürüncük bez iddi‘â eden Mustafa b. Ahmed ve üç top hilâlî bürüncük bez ve iki top melez bürüncük bez iddi‘â eden es-Seyyid Süleyman b. es-Seyyid Salih ve yedi hilâlî bürüncük gömlek iddi‘â eden es-Seyyid Süleyman b. Ali ve dört top gümüş kenârlı bürüncük bez ve bir top kenârlı iki kat bürüncük bez ve iki kat iki bürüncük gömlek ve dört ma‘sûm gömleği iddi‘â eden sakā Hasan b. Abdullah ve dokuz melez bürüncük gömlek ve iki kat bürüncük bir gömlek iddi‘â eden Ahmed b. Mustafa ve dokuz top iki kat bürüncük bez iddi‘â eden Rafael v. Serkiz nâm kimesneler mahmiye-i İslambol’da meclis-i şer‘-i hatîrde zikr olunan bezlere ve gömleklere vâzı‘ü’l-yed olan es-Seyyid Osman b. es-Seyyid Ahmed muvâcehesinde Bezzâzistân-ı atik kurbünde ve Yağlıkçılar sûkunda vâki‘ bir kepenk dükkânda müşâhereten müstecir olan gāib ani’l-beled bürüncükcü Abdurrahman b. Abdullah’a bi-tarîkı’l-emâne vaz‘ eylediğim zikr olunan eşyâlarımız târîh-i i‘lâmdan üç ay mukaddem Mısr-ı Kāhire cânibine râhî ve âzim oldukda bize teslîm eylemek üzere mezbûr es-Seyyid Osman’a emir ve tarafından tevkîl etmekle mezbûr es-Seyyid Osman’dan her birimiz taleb ederiz deyü ba‘de’d-da‘vâ ve’l-istintâk mezbûr es-Seyyid Osman dahi cevâbında hâl minvâl-i muharrer üzere olduğunu ikrâr ve rızâsıyla zikr olunan eşyâları sâhibleri mezbûrûna teslîme ta‘ahhüd eylediği tescîl ve huzûr-ı âlîlerine i‘lâm olundu.

Fî 27 Zilhicce sene 1179.