İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 170 Hüküm no: 136 Orijinal metin no: [65-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un Mimar Çarşısı’nda olan keresteci dükkânının kimseye zararı olmadığının tesbiti Mimar Çarşısı’nda keresteci dükkânı keşif Ma‘rûz, Vârid olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri Hâssa mi‘mârlarından es-Seyyid İbrahim ve Ahmed halîfeler ile mahmiye-i İstanbul’da Mevlevîhane Yenikapısı dâhilinde Aydın Kethüdâ mahâllesinde Mimar Çarşısı’nda vâki‘ zikri âtî dükkâna varıp huzûr-ı Müslimînde akdeylediği meclis-i şer‘-i şerîfde sâhibe-i arzuhâl Hadîce Hatun bt. Silahşor-ı Şehriyârî Mehmed Ağa tarafından husûs-ı âti’z-zikrde nâibü’l-vekâle vekîli ve zevci el-Hâc Ahmed b. el-Hâc Mustafa takrîr-i kelâm edip işbu derûnunda akd-i meclis-i şer‘-i kavîm olunan bir tarafı bostan ve bir tarafı Çorbacı Mehmed Ağa zevcesi ve bir tarafı Zeyneb Hatun menzilleri ve taraf-ı râbi‘i tarîk-i âm ile mahdûd müvekkilem ve zevcem Hadîce Hatun’un mülk-i mevrûsu olan bir bâb menzili tahtında vâki‘ dükkânı elli-altmış seneden beri keresteci dükkânı olup hattâ işbu yedinde olan hücec-i şer‘iyye-i müte‘addideden dahi sinîn-i mezkûreden beri keresteci dükkânı olduğu münfehim olup ve altmış iki târîhinde İsmail Asım Efendi merhûm hazretlerinin İstanbul Kādılığı’nda bi’l-cümle keresteci dükkânları tahrîr ve defter olunup dükkân-ı merkūm dahi ber-vech-i muharrer keresteci dükkânı olmak üzere dâhil-i defter olup dahl olunmak îcâb etmez iken dükkân-ı merkūm ile ve yine mahâll-i mezkûrda vâki‘ âhar dükkânda keresteci ve müstecir olan Bogos v. Vaşo nâm zimmî iki dükkânı ma‘an isticâr eylemeği istiksâr ve birini terk kesâd verir deyü işbu hâzirûn bi’l-meclis Kurşunlu Câmi‘i imamı İbrahim b. Osman ve Mustafa b. Ömer ve Ali b. Halil ve diğer Ali b. Mehmed ve Musa b. Mehmed nâm kimesneleri iğfâl eyleyip mezbûrlar dahi mesfûru Davudpaşa Mahkemesi’ne ihzâr ve müvekkilem mezbûrenin merkūm dükkânı mahâlle-i mezbûre menâzili mâbeyninde olmağla keresteci dükkânı olmaz ve ancak keresteci mahzeni olmağla zarârı vardır deyü hilâf-ı vâki‘ ihbâr ile dükkân-ı merkūmun mesfûrun ihrâcına bir tarîkle i‘lâm etdirip dükkân-ı merkūmun gediği benim olmağla gerek bana ve gerek müvekkilem mezbûreye gadr murâd etmekle hakīkat-i hâl suâl [66] olunmak matlûbumdur dedikde bin yüz yirmi dört ve elli dört ve yetmiş dört târîhlerinde dükkân-ı merkūmun keresteci dükkânı olduğu tahrîr olunan hucec-i şer‘iyyeye ba‘de’n-nazar çarşıda olduğu ba‘de’l-mu‘âyene ahâlî-i mahâlle hâzirûn bi’l-meclis Hâfız Mehmed Efendi ve Osman Efendi ve Müezzin el-Hâc Mehmed ve Mustafa Çelebi ve Mehmed Ağa ve el-Hâc Ahmed ve Mütevellî Ali Efendi ve diğer Mehmed Çelebi ve Ali Çelebi ve Mahmud Beşe ve es-Seyyid el-Hâc Hüseyin ve Molla İbrahim ve Mimar İmamı Ali Efendi ve es-Seyyid Hoca Mehmed Efendi ve Nakkaş Hüseyin Çelebi ve İsmail Beşe ve Kahveci Ali Beşe ve sâir mazbûtü’l-esâmi otuz nefer kimesnelerden hakīkat-i hâl istihbâr olundukda dükkân-ı merkūmun altmış seneden beri keresteci dükkânı olup tahta ve kiremid bey‘ olunduğu ve kimesneye zarârı olmadığını alâ tarîkı’ş-şehâde ve’t-tevâtür haber verdiklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm [olundu]. Bâkī el-emrü li-men-lehü’l-emr. Fî 11 min-Zilka‘de sene [11]79.