İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 173 Hüküm no: 140 Orijinal metin no: [66-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub Ağa Vakfı’ndan olup Halil Ağa tasarrufunda olan menzil ile Agob ve Haçador’un menzillerinin ağır hasarlı olmaları nedeniyle yıkılmaları gerektiği Keşif, sâbık kasabbaşı Halil Ağa’nın Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Abdullah ve es-Seyyid İsmail halîfeler ve sâir ümenâ-yı şer‘le mahmiye-i İstanbul’da Samatya kapısı dâhilinde Sancakdâr Hayreddin mahâllesinde vâki‘ Dergâh-ı âlî kapıcıbaşılarından Halil Ağa b. el-Hâc Ahmed’in Kapıağası Yakub Ağa Vakfı’ndan tasarrufunda olan atik kârgîr ebniye üzerine varıp [67] ebniye-i mezkûrenin bâlâ ve havasına binâ olunan kefere menâzilinden tahtında olan kârgîr ebniye ile kadden otuz zirâ‘ mikdârı irtifâ‘ı olan Ekmekçi Agob ve Dülger Haçador nâm zimmîler tasarrufunda olan iki bâb menzilin ve tahtında olan kârgîr duvar ve kemerlerinin münşak ve harâb ve tarîk-i âm üzerine inhidâma meyli olduğu mu‘âyene olunup hedm olunmadığı takdîrce münhedim olup mârreye ve etrâfında olan menâzil-i Müslimîne ızrâr edeceği müte‘ayyin olmağla zikr olunan iki bâb menzilin hedmi ile mesfûrân Agob ve Haçador zimmîlere oğulları Ohannes ve Artin zimmîler vesâtetiyle ba‘de’t-tenbîh mûmâ-ileyh Halil Ağa kulları dahi tasarrufunda olan kârgîr ebniye-i mezkûrenin hedmine ta‘ahhüd eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 2 min-Muharrem sene 1180.