İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 174 Hüküm no: 141 Orijinal metin no: [67-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer ve Parsih’in ortak oldukları fırının Alpek ve Avanis’e devredilmesi Üsküdar’da İhsâniye’de vâki‘ ekmekçi fırın gediği fürûht ile küşâde olup ta‘yîn dahi fasl olunmuşdur. Ma‘rûz, Sâdır olan fermân-ı âlîlerine imtisâlen dâ‘îhânede medîne-i Üsküdar kādısı fazîletlü es-Seyyid Mehmed Efendi dâ‘îleriyle akdolunan meclis-i şer‘-i şerîfde medîne-i mezbûrede İhsâniye mahâllesi ahâlîsinden İmam Hâfız Mehmed Efendi ve kuzâtdan Salih Efendi ve Mehmed Efendi ve Mustafa Efendi ve Yağlıkçı es-Seyyid Osman ve Yağlıkçı Bekir Ağa ve Basmacı el-Hâc İbrahim ve Tâcir el-Hâc Süleyman ve Hâfız Ali Efendi ve Mumcu el-Hâc İbrahim ve es-Seyyid Eyyûb Çelebi ve Haffâf es-Seyyid el-Hâc Ahmed ve Feyzullah Ağa ve el-Hâc Ali ve es-Seyyid Mehmed Çelebi ve Hâfız Mustafa Efendi ve Müezzin Molla İbrahim ve Miftâhîzâde Abdullah Ağa ve Molla Yusuf ve Ali Efendi ve Tokâtî Mustafa Ağa ve Süleyman Ağa ve Hâfız Süleyman ve Hâfız Mehmed ve Hâfız Mehmed Emin ve el-Hâc Mehmed ve Hüseyin Beşe nâm kimesneler medîne-i mezbûrede Köprübaşı’nda uncu olan el-Hâc Osman oğlu Ömer mahzarında mahâlle-i mezbûrede vâki‘ ekmekçi ve çörekçi fırınının yevmiye ta‘yını âhar arzuhâllerinde Başmuhâsebe derkenârı mantûkunca mezbûr Ömer’in değirmeninden ta‘yın ve gediğinin dahi nısfı mezbûr Ömer’in ve nısf-ı âharı Francılacı Parsih nâm zimmî üzerinde iken bir seneden ziyâde fırın-ı mezkûru kapayıp ta‘yını âhar fırınlara vermekle mahâllemizde ekmek için muzâyaka-i külliye hâsıla olmağla ekmek ve simid işlenip küşâd olunmak matlûbumuzdur deyü mezbûr Ömer’den teşekkî etdiklerinde, mezbûr dahi cevâbında Arnavud tâifesinden bundan akdem birkaç nefer kimesneler fırın-ı mezkûrda işleyip altı yüz guruşdan ziyâde akçemi itlâf ve izâ‘at etmeleriyle şimdi bir vechile işletmeğe kudretim yokdur deyü ibâ edip nizâmı ekmekçi ustaları ma‘rifetleriyle rü’yet olundukda yine mahâll-i mezkûr kurbünde Doğancılar fırınında ekmekçi olan hâzır bi’l-meclis Alpek zimmî şerîki Avanis zimmî ile fırın-ı mezkûru küşâd edip ekmek ve simid ve çörek işlemek üzere ta‘ahhüd etdikde mezbûr Ömer ile şerîki merkūm Parsih tarafından karındaşı ve sâbitü’l-vekâle vekîli Ağya zimmî dahi fırın-ı mezkûrun ta‘yınından ve gediğinden rızâlarıyla bi’l-külliye fâriğ ve merkūm Alpek ve şerîki merkūm Avanis’in zimmetlerini ibrâ ve bu minvâl üzere nizâm verilmekle vech-i meşrûh üzere fırın-ı mezkûrun ta‘yını mezbûr Ömer’in değirmeninden merkūm Alpek değirmenine nakil olunup kaydına şerh verilmek bâbında fermân-ı âlîleri sudûrunu iltimâs eyledikleri huzûr-ı âlîlerine i‘lâm olundu. Fî 2 min-Muharrem sene 1180.