İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 186 Hüküm no: 153 Orijinal metin no: [74-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremden zarar gören Sırıkçılar, Çadırcılar ve Muytapçılar çarşısı dükkânlarının yangına dayanıklı bir şekilde yeniden inşası Sırıkçılariçi ve ol havâlî ahşabdan olmağla i‘lâm Ma‘rûz, Bi-emrillâhi te‘âlâ bu def‘a vâkı‘a olan zelzeleden Sırıkçılar ve Çadırcılar ve Mûytâbcılar çarşı dükkânları ve kemerlerinin münhedim olan mahâlleri kemâkân kârgîr binâ olunması irâde buyrulup kemâl-i şefkat ve merhamet-i hazret-i cihândârîden sokak kemerlerinin masrafları taraf-ı hümâyûndan ihsân ve tahtında olan dekâkîn masrafları bu hasâretden musân buyrulmak kasd-ı hayrıyla binâ-yı mezkûrun emîni efendi ma‘rifetiyle mübâşeret olunup lâkin zikr olunan çarşı ahâlîsinden Mûytâblar Kethüdâsı el-Hâc Mustafa ve esnâfından el-Hâc Süleyman ve Mahmud Çelebi ve Mustafa Odabaşı ve Çadırcılar Perdecibaşısı el-Hâc Mehmed ve Çadırcı el-Hâc Halil ve İbrahim ve Mehmed Çelebi ve Sırıkçılar Kethüdâsı Halil ve Yiğitbaşısı Hasan ve esnâfından Mustafa ve diğer Mustafa sa‘âdetlü Yeniçeri Ağası kullarına varıp ma‘rifetleriyle meclis-i şer‘-i şerîfe gelip çarşımız vâsi‘ olmağla ekser araba ve yüklü hayvânât mürûr etmekle kemerlerine vehn târî olduğu ecilden işbu zelzeleden münhedim ve dükkânlarımızın dahi harâbına bâdî olup bu def‘a yine kârgîr kemer binâ olunur ise altında emniyetimiz bi’l-külliye meslûb olmağla hâlâ Saraçhâne kurbünde vâki‘ Haffâfhâne’nin sokak kemerleri misillü harîkden masûn olmak için iki taraf dükkânları kârgîr ve kemerleri üstüne kifâyet mikdârı duvar binâ ve duvarlar arasına mukaddem olduğu vech üzere iktizâsına göre ziyâ ahzı için havâle camları vaz‘ ve asıl sokak üstü ahşabdan pûşîde ve derûnu Bağdâdî tavan ve üstü horasan ve kireç ile kalemkârî binâ buyrulur ise müddet-i kalîlede husûl-pezîr olup ve tahtında emn ü rahat ile ve devâm-ı ömr-i devlet-i hazret-i cihândâreyne müsâra‘at ve muvâzabet ederiz deyü sokak kemerlerinin vech-i meşrûh üzere binâ olunmasını istid‘â eyledikleri iltimâslarıyla huzûr-ı âlîlerine i‘lâm olundu. Fî 11 Muharremü’l-haram sene 1180