İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 185 Hüküm no: 152 Orijinal metin no: [74-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa ve ortağı Fatıma Hatun’un değirmen kiracıları Bağdisar, Sahak ve Haçok ile anlaşmaları Hazret-i Eyüb’de Koltuk kurbünde değirmen nizâ‘ı Ma‘rûz, Eyüb’de Koltuk kurbünde vâki‘ mukaddemâ içinde fırını ve dört horosu olup hâlâ fırın-ı mezkûrun mahâlline bir horos dahi binâ olunmağla beş horoslu olan değirmen iştirâken mutasarrıf sâhib-i arzuhâl Ahmed Ağa b. Abdurrahman kendi tarafından asâleten ve şerîki Fâtıma Hatun tarafından vekâleten meclis-i şer‘-i şerîfde değirmen-i mezkûrda müşâhereten müstecirleri Bağdisar ve Sahak ve Haçok muvâcehelerinde mesfûrûn Bağdisar ve Sahak ve Haçok değirmen-i mezkûrda mu‘tâd üzere otuz beş guruş ücret kavliyle müstecir olmalarıyla târîh-i i‘lâm gurresine gelince iki ayda değirmen-i mezkûrun iktizâ eden mahâllerine malımızdan altmış bir guruş sarf eyledik deyü icâre-i mezkûreye mahsûb ve tenkīs murâd etmeleriyle ben dahi inkâr etmeğin beynimizde nizâ‘ vâki‘ olup hâlâ beynimiz ıslâh olmağla yine her şehr otuz beş guruşa değirmen-i mezkûru mesfûrûn benden isticâr ve kabûl ve ben dahi icâr etdikden sonra icâre-i mezkûreden her şehr dokuz guruşuyla değirmen-i mezkûrun değirmen taşı ve ahır ve anbar kalafatı ve kiremid aktarması ve tulumba ve sâir ta‘mîre muhtâc olan mahâllerini ta‘mîr ve termîm edip ve on guruşdan ziyâde masrafa mütehammil olan mahâllerini bana ihbâr ben dahi icâreye mahsûb etmeyip kendi malımdan ta‘mîr etmek üzere mesfûrûn ile mukāvele eylediğimizde onlar dahi bu minvâl üzere ta‘ahhüd etmeleriyle kat‘-ı nizâ‘ eyledik dediğini mesfûrûn zimmîler tasdîk eyledikleri bi’l-iltimâs huzûr-ı âlîlerine i‘lâm olundu. Fî 9 Muharremü’l-haram sene 1180.