İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 187 Hüküm no: 155 Orijinal metin no: [75-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Efendi’nin evinin pencerelerini eski haline getirerek komşusu Osman’ın evine olan zararını gidermeyi taahhüt etmesi Yeni Odalar kurbünde keşif Ma‘rûz, Sâdır olan fermân-ı âlîlerine imtisâlen savb-ı şer‘-i âlîden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Osman ve es-Seyyid İsmail Halîfeler ile mahmiye-i İstanbul’da Yeni Odalar kurbünde Mustafa Bey mahâllesinde vâki‘ arzuhâlde mezkûrü’l-ism Rumeli kuzâtından Osman Efendi b. Mustafa’nın mülk menziline varıp akdeylediği meclis-i şer‘-i şerîfde menzil-i mezkûr hâricinde vâki‘ sâhib-i arzuhâl Osman nâm sagīrin vasiyy-i mansûbesi anası Âişe Hatun bt. Abdullah tarafından husûs-ı âti’z-zikrde vekîl olduğu zâtını ârifân es-Seyyid Mustafa b. Ahmed ve diğer Mustafa b. Mehmed şehâdetleriyle sâbit Şerîfe Hadîce Hatun bt. İbrahim mezbûr Osman Efendi muvâcehesinde mezbûr Osman Efendi müvekkilem mezbûre Âişe’nin vasîsi olduğu sagīr-i mezbûrun menzili tarafına ziyâ için kadden bir zirâ‘ ve altı parmak ve arzen bir zirâ‘ camları var iken vaz‘-ı kadîmini tağyîr ve yerine ikişer zirâ‘ kebîr camlar vaz‘ ve sagīr-i mezbûrun menzilinin makarr-ı nisvân olan mevâzi‘i görünmekle havâlesini def‘ eylesin deyü bi’l-vekâle da‘vâ ve müdde‘âsını vech-i meşrûh üzere mahâlle-i mezbûrede sâkin udûlden Ahmed Efendi b. Mehmed ve mahâlle-i mezbûre imamı Mustafa Efendi b. İbrahim şehâdetleriyle ba‘de’l-isbât mi‘mârân-ı mezbûrân dahi mu‘âyene eylediklerinde fi’l-vâki‘ sonradan vaz‘ olunan kebîr camların havâle zarârı olduğu bi’l-müşâhede ihbârlarıyla müte‘ayyin ve zâhir olmağın kemâ-fi’l-evvel havâle zarârı olmayan kadden bir zirâ‘ ve altı parmak ve arzen bir zirâ‘ sagīr camlar vaz‘ına mezbûr Osman Efendi’ye tenbîh, ol dahi kadîmî üzere sagīr camlar vaz‘ına ta‘ahhüd eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 10 min-M sene [1]180.