İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 189 Hüküm no: 158 Orijinal metin no: [76-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzcu esnafından olmayan Mehmed, Mustafa, İbrahim ve Salih’in mahzenlerinde tuz bulundurmayacaklarına dair taahhütte bulunmaları Tuz nizâmı Ma‘rûz Mahmiye-i İslambol’da Hasır İskelesi’nde Tuzcu Esnâfı Kethüdâsı Mehmed ve ustalarından Ömer ve el-Hâc Hüseyin ve Mustafa ve Abdurrahman ve Halil ve es-Seyyid Hüseyin ve Molla Mehmed ve el-Hâc Mehmed ve Süleyman ve diğer Mustafa ve es-Seyyid Ömer ve Molla Ali ve diğer Ali ve diğer Ali mahmiye-i İslambol’da meclis-i şer‘-i şerîfe ihzâr etdirdikleri Galata’da Azabkapısı’nda Mehmed ve Mustafa ve Tophane Boğazkesen’de İbrahim ve Fındıklı’da Salih terâfu‘larında yedimizde olan tuğrâ-yı [garrâ] ile mu‘anven fermân-ı âlîşân mantûkunca ez-kadîm Bahr-ı sefîd ve siyâhdan gelen envâ‘ tuz getiren sefîneler Hasır İskelesi’ne yanaşıp ve tuz mahsûs bakkāl metâ‘ı olup biz dahi [77] bakkālâna mülhak ve ekser-i nâs metâ‘-ı mezkûru bakkāldan almağa me’lûf olmağla İslambol’da ve tevâbi‘inde olan her bakkāl iştirâ ve dükkânına vaz‘ ve narh-ı rûzîsi üzere ibâdullaha fürûht edegelip ve esnâfdan olanlar ihfâ ve ihtikâr etmemek ve ecânibden olanlar aslâ karışmamak şurûtundan iken mezbûrûn Mehmed ve Mustafa ve İbrahim ve Salih esnâfda alâkaları yoğiken mahâll-i mezkûrelerinde mehâzîn ittihâz ve bihâr-ı mezkûreden gelen sefîne üzerine varıp hilâf-ı mu‘tâd tuz iştirâ ve ihtikâr ve bizim kâr ü kisbimize müdâhale ederler deyü takrîrine mutâbık bir kıt‘a fermân-ı âlîşân ibrâzıyla teşekkî etdiklerinde onlar dahi ikrâr [ve] fî-mâ-ba‘d mehâzîn-i mezkûrelerinde ihtikâr eyledikleri tuzlarını rızâlarıyla esnâf-ı mezkûreye bey‘ edip ve kendülerine kadr-ı kifâye lâzım olan tuzu esnâf-ı mezkûreden narh-ı rûzîsi üzere çekilmiş olduğu hâlde iştirâ etmek üzere ta‘ahhüd etdiklerinde esnâf-ı mezbûrûn dahi aslâ cevr ü ezâ etmeyip narh-ı rûzîsi üzere mezbûrûna her ne mikdâr tuz iktizâ ederse bey‘ine ta‘ahhüd ve ittifâk eyledikleri izzetlü Yeniçeri Ağası tarafından ta‘yîn Mumcu kulları iltimâsıyla huzûr-ı âlîlerine i‘lâm olundu. Fî 12 min-Muharremü’l-haram sene 1180.