İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 188 Hüküm no: 157 Orijinal metin no: [76-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekfursarayı’na nakledilen şişeci esnafının yerlerinden memnun olduklarından eski yerlerine dönmek için verilen arzuhalin dikkate alınmaması Şîşeci esnâfı Ma‘rûz, Hâmiş-i arzuhâlde sâdır olan fermân-ı âlîlerine imtisâlen şişeci esnâfının yedlerinde olan senedâta nazar olundukda esnâf-ı mezkûrenin bundan akdem istid‘â ve iltimâslarıyla kadîmî olan mahâllerden Tekfursarayı’na bâ-hatt-ı hümâyûn-ı inâyet-makrûn nakil ve iskân olunup içlerinden ba‘zıları mahâll-i mezkûrdan çıkıp kadîmî mahâllerine nakil dâ‘iyesiyle birkaç def‘a arzuhâl ve tasdî‘-i ser-i mübârek-i hüsrevâneye cesâret eylediklerine binâen mahâll-i kadîmlerine nakil etmelerine hatt-ı hümâyûn sâdır olmuş iken esnâf-ı mezkûrenin tekrâr niyâz ve istirhâmlarıyla yine Tekfursarayı’nda ibkā olunmaları irâde buyrulup mukaddemâ yedlerine i‘tâ buyrulan hatt-ı hümâyûn-ı şevket-makrûn ile mu‘anven emr-i şerîfin kaydına şerh verilip bu def‘a esnâf-ı mezkûre imzâsıyla yine mübârek rikâb-ı müstetâba arzuhâle cesâret olunmağla Tekfursarayı’nda beş aded şişeci fırını ustaları olan nâzırları Osman ve Yiğitbaşıları Ali ve Derviş Ahmed ve Usta Mustafa ve Bekir ve Süleyman ve Hüseyin ve diğer Mustafa ve Osman ve diğer Mustafa ve diğer Hüseyin ve diğer Osman ile Yahûd ustalarından Mosi ve Hayim ve Konorta ve diğer Hayim ve İlya ve Avram meclis-i şer‘-i şerîfe ihzâr eyledikleri mukaddemâ Tophane’de Hendek içinde fırını olup hâlâ Tekfursarayı’nda fırın ustası Halil b. Mehmed mahzarında bizler sâkin olduğumuz Tekfursarayı’ndan her vechile hoşnûd ve kâr ü kisbimize ve tarîk-i ma‘âşımıza vücûhla evfak olmağla du‘â-yı devâm-ı devlet-i hazret-i pâdişâh-ı adâlet-penâha muvâzabet üzere olup işbu arzuhâlden aslâ bizim haberimiz olmayıp işbu mezbûr Halil Tekfursarayı’nda olan fırınını yeğeni Hüseyin nâm kimesneye idâre etdirdip kendi dahi battal fırınını açmak dâ‘iyesiyle arzuhâle cesâret etmekle bizim aslâ rızâmız olmayıp fî-mâ-ba‘d gerek mezbûr Halil ve gerek içimizden gayrısı bu misillü harekete dahi cüret ederse ol misillü kizbi ihtiyâr ve tasdî‘-i ser-i sa‘âdet-i hazret-i cihândârîye ictisâr etdiği için gereği gibi te’dîb olunmasını istid‘â ederiz deyü bu vechile emr-i âlîşân sudûrunu iltimâs etdiklerinde mezbûr Halil dahi arzuhâli verdiğini ikrâr ve cürmünden isti‘fâ ve istiğfâr ve Tekfursarayı’nda bir mahâlde sâkin olmak kendülere hayırlı olduğunu ol dahi i‘tirâf edip ve bir dahi arzuhâle tasaddî ederse te’dîb olunmağa râzı olduğu ma‘lûm-ı devletleri buyruldukda emr ü fermân hazret-i men-lehü’l-emrindir. Fî 12 Muharremü’l-haram sene 1180.