İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 190 Hüküm no: 160 Orijinal metin no: [77-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hırsızlık suçuyla Boğazkesen Kalesi’ne hapsedilen Avanis’in serbest bırakılması Sirka töhmetiyle Boğazkesen’den ihrâç Ma‘rûz, Derkenâr olunduğu vech üzere Boğazkesen Kal‘ası’nda habsolunan sâhib-i arzuhâl Avanis’in sâbıkāsı vardır deyü ma‘lûmu olanlardan tefahhus için sâdır olan fermân-ı âlîlerine imtisâlen kıbel-i şer‘-i şerîfden Mehmed Emin Efendi dâ‘îleri irsâl, ol dahi merkūm Avanis’in mahâlli olan Kumkapı dâhilinde Kasablar kurbüne varıp husûs-ı merkūm ma‘lûmu olan <> İmam vekîli Mehmed Efendi ve İbrahim Bey ve Müezzin Molla Ali ve Duhânî es-Seyyid Mehmed [ve] Sandalcı es-Seyyid Mehmed [ve] Arayıcı İsmail ve Duhânî Ali ve ehl-i zimmetden Papa Kabril, Papa İstefan, Papa Bogos ve Dülbendçi Kigork, Attâr Kigork, Yemenîci Arslan, Manas, Kasab İspir, Bapuşcu Minas, Sandalcı Agob, Attâr Sefer [nâm] on sekiz nefer kimesnelerden suâl etdikde merkūm Avanis’in sirka misillü töhmeti olduğu ma‘lûmları olmadığından gayrı derkenârda mezkûr kurşun ahz eden İsmail’in refîki enserci zimmînin mücerred haberiyle mahbûs olmuş idi deyü ihbâr eylediklerini mezbûr dâ‘îleri meclis-i şer‘-i şerîfe gelip ba‘de’l-inhâ mesfûr Papas İstefan ve Papas Toma ve Dülbendçi Kigork ve anası Meryem mezbûrun nefsine ve hîn-i mutâlebede ihzârına kefil olmalarıyla afv ve ıtlâkını istid‘â eyledikleri iltimâslarıyla huzûr-ı âlîlerine i‘lâm olundu. Fî 13 min-Muharremü’l-haram sene 1180.