İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 191 Hüküm no: 161 Orijinal metin no: [78-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bileyici Hacı Mustafa Çeşmesi Vakfı’nın mütevelliliğine vâkıfın kardeşlerinin çocukları olan Ayşe ve Rukıye’nin tayin olunması Bileyici el-Hâc Mustafa Çeşmesi’nin tevliyeti Ma‘rûz, Sâdır olan fermân-ı âlîye imtisâlen işbu arzuhâl ve derkenâra nazar olundukda Büyükdere kurbünde Kefeli karyesinde vâki‘ Bileyici el-Hâc Mustafa Çeşmesi Vakfı’nın mütevellîyesi Âişe bt. Mehmed fevt oldukda karındaşı Fâtıma nâm hatunun kızı Rukıye ekber evlâd-ı vâkıfdanım deyü bi’l-ihbâr yetmiş altı Ramazanı’nın on dördüncü târîhinde nâzır-ı vakıf arzıyla üzerine berat etdirmiş, şimdi sâhibe-i arzuhâl Âişe tevliyet-i mezkûreyi da‘vâ etmekle zâtları ba‘de’t-ta‘rîf mezbûre Rukıye ile terâfu‘larında gerek mezbûre Âişe ve gerek mezbûre Rukıye evlâd-ı vâkıf-ı mezbûrdan olmayıp mezbûre Âişe vâkıf-ı mezbûr el-Hâc Mustafa’nın karındaşı Abdullâhın oğlu diğer Mustafa’nın kızı ve mezbûre Rukıye dahi diğer karındaşı el-Hâc Mehmed’in kızı ve müteveffât-ı mezbûre Âişe’nin kız karındaşı mezbûre Fâtıma’nın sulbiye kızı olduğu ikrâr u i‘tirâflarıyla sâbit ve zâhir olup ve yedlerinde dahi ma‘mûlün-bihâ vakfiyeleri olmayıp evlâdiyet üzere hak iddi‘âları olmadığından gayrı mezbûre Âişe zikr olunan çeşmeyi kendi malından ta‘mîr ve terkīme tâlibe olmağla tevliyet-i mezkûre <> münâsafe vechi üzere kendülere müceddeden tevcîh buyrulmak gerek mezbûretân ve gerek vakf-ı mezbûr hakkında enfa‘ olduğu ecilden tevliyet-i mezkûre vâkıf-ı mezbûrun karındaşları evlâdı mezbûretân Âişe ve Rukıye’ye ber-vech-i iştirâk tevcîh ve müceddeden mahâlline kayd buyrulmak bâbında emr ü fermân hazret-i men-lehü’l-emrindir. Fî 13 Muharrem sene 1180