İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 199 Hüküm no: 173 Orijinal metin no: [83-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeyrekçi esnafından Hasan b. Mustafa’nın kanuna aykırı hareketleri nedeniyle Boğazkesen Kalesi’nde hapsolunması Çeyrekçi ustalarından Boğazkesen’de kal‘a-bend Ma‘rûz, Hâlâ Kasabbaşı Ali Ağa ve Kasablar Kethüdâsı Mehmed kulları Yeni Câmi‘-i şerîf havlusu çeyrekçileri celeblerinden el-Hâc Hasan b. Mustafa’yı meclis-i şer‘-i hatîre ihzâr ve muvâcehesinde mezbûr el-Hâc Hasan kendi hâlinde olmayıp nizâm-ı kadîme mugāyir hareketde olmağla öteden beri kasabbaşılar ve kethüdâ ve ihtiyâr ustalar ma‘rifetleriyle gelen koyunların her sürüsünden çaşni tutulup kimesneye gadr ve himâyet olunmayarak bâ-fermân-ı âlî tevzî‘ olunagelmiş iken mezbûr el-Hâc Hasan bir gün mukaddem Rumeli cânibinden getirdiği üç yüz re’s koyunları çeyrekçilere tevzî‘ edip bu makūle mugāyir-i nizâm ve hilâf-ı fermân-ı âlî hareketi mütetebbu‘ olup mezbûr el-Hâc Hasan te’dîb olunmadıkça sâire sirâyet ve nizâmımızın ihtilâline bâdî olur deyü teşekkî etdiklerinde mezbûr el-Hâc Hasan dahi vech-i meşrûh üzere mugāyir-i nizâm ve hilâf-ı fermân-ı âlî hareketini ikrâr u i‘tirâf etmeğin sâire mûceb-i ibret için mezbûr el-Hâc Hasan Boğazkesen Kal‘ası’nda izzetlü yeniçeri ağası ma‘rifetiyle te’dîb olunmak bâbında emr ü fermân hazret-i men-lehü’l-emrindir. Fî 21 Muharrem sene [11]80.