İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 200 Hüküm no: 174 Orijinal metin no: [83-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan Çarşısı’nda Baba Ali Fırını ustaları Malkos, Agob ve Serkiz’in Eski Saray yakınında Mahmud Ağa ve ortaklarına ait dükkânı ekmek satmak üzere kiralamaları Eski Saray kurbünde ekmekçi iskemlesi icâr, Ma‘rûz, Mercan çarşısında vâki‘ Baba Ali Fırını demekle ma‘rûf fırın ekmekçisi ustaları Agob ve Malkos ve Serkiz meclis-i şer‘-i şerîfde mezkûr fırının yedi aded iskemlesi olup bir iskemlesi Saray-ı atik kurbünde olup ve Mahmud Ağa ve Mehmed Ağa ve Âişe Hatun tasarruflarında olan mahâll-i mezkûrda vâki‘ dükkânda ekmek bey‘ olunagelmekle dükkân-ı mezkûru mezbûr Mehmed Ağa kendi tarafından asâleten ve şerîkleri mezbûrân taraflarından vekâleten hâlâ içinde müşâhereten müstecir olan Avanis zimmî ile fesh-i icâre edip her şehir dörder buçuk guruşa zikr olunan ekmekçilere icâr eyledikden sonra mesfûrûn dahi taraflarından zimmî-yi merkūm Avanisi ikāmet ve fırınlarından iskemle olmak üzere dükkân-ı mezkûra ekmek irsâl ve zimmî-yi merkūma mu‘tâd üzere bey‘ etdirmeğe ta‘ahhüd ve eğer dükkân-ı merkūmdan zimmî-yi merkūmu ihrâc ederse malından teberru‘an iki yüz elli guruş vermek üzere te’mîn ve ekmekçi ustalarından hâzırân bi’l-meclis el-Hâc Mahmud ve Hasan Çelebi dahi zimmî-yi merkūmu dükkân-ı merkūmdan fırın-ı mezkûrdan ekmek nakil ve bey‘ etdirilmesine alâ-tarîkı’l-kefâle ta‘ahhüd etdiklerinde zimmî-yi merkūm dahi râzı ve bu minvâl üzere mukāveleleri zabt olunduğu bi’l-iltimâs huzûr-ı âlîlerine i‘lâm olundu. Fî 21 Muharrem sene 1180.