İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 200 Hüküm no: 175 Orijinal metin no: [83-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Konya’da Hacı Davud Camii imamı Mehmed’in azledilerek yerine Mustafa’nın tayin olunması Konya’da vâki‘ imâmet, Ma‘rûz, Konya’da Sinan Perakendesinde Hacı Davud Câmi‘i Vakfı’ndan almak üzere yevmî bir akçe vazîfe ile câmi‘-i merkūmda imam olan es-Seyyid Mehmed kendi hâlinde olmayıp imâmete münâfî hâli olmağla menfûr-ı cemâ‘at olduğu mahâllesi ahâlîsi ihbârlarıyla yetmiş sekiz senesi Ramazanı târîhinde Konya Nâibi Abdülbaki arzıyla muhtâr-ı cemâ‘at olan Hâfız Mustafa’ya tevcîh olunup ba‘dehû mezbûr Mehmed kendi hâlinde ve hizmetinde mukīm olmak ta‘ahhüdüyle sene-i mezbûre Zilhiccesi’nde yine nâib-i mezbûr arzıyla bir takrîble sâhib-i evvelim ve mezbûr Mustafa’dan [84] cihet-i mezkûreye ehakkım deyü üzerinden alıp şimdi mezbûr Mustafa yine mezbûr Mehmed’in ref‘inden üzerine tevcîh olunmasını arzuhâl etmekle bu dâ‘îlerine hitâben sâdır olan fermân-ı âlîlerine imtisâlen mezbûr Hâfız Mustafa’nın keyfiyetini meclis-i şer‘-i şerîfe hâzirûn olan Mısır kuzâtından Konyalı es-Seyyid Mustafa Efendi ve Hoca Hâfız Ali Efendi ve mahâlle-i mezbûre ahâlîsinden olup hâlâ Vâlide Hanı’nda olan Hasan b. Hüseyin ve diğer Hasan b. Mustafa ve İbrahim b. Ömer ve Ahmed b. Hasan ve Ali b. Halil ve es-Seyyid Ahmed b. Mehmed ve es-Seyyid Mehmed b. Mehmed ve diğer Mehmed b. Mustafa ve diğer Mehmed b. Mehmed ve diğer Mehmed b. Hüseyin ve diğer Hasan b. Mehmed nâm on beş nefer kimesnelerden suâl olundukda mezbûr Mehmed için hâlâ ef‘âl-i sâbıkāsında mükibb ü musırr olup derkenâr olunan sûret-i fermân-ı âlîşânda münderic olduğu üzere mahâllesi imamını akd-i enkiha zımnında hilâf-ı mu‘tâd yirmişer ve otuzar guruş akçe talebiyle rencîde ve alâkası olmadığı umûra karışıp ba‘zılarını ehl-i örfe gamz ile tecrîm ve ba‘zılarını şütûm ile tekdîr etdiğinden gayrı ve hizmetini vaktiyle edâ etmeyip menfûr-ı cemâ‘at olduğunu ve sâhib-i arzuhâl mezbûr Hâfız Mustafa’nın kendi hâlinde olup muhtâr-ı cemâ‘at olduğunu alâ-vechi’s-sıhha ihbâr etdikleri ma‘lûm-ı devletleri buyruldukda cihet-i mezkûre yine mezbûr Mehmed’in ref‘inden mezbûr Hâfız Mustafa’ya tevcîh buyrulmak bâbında emr ü fermân hazret-i veliyyü’l-emrindir. Fî 21 min-Muharremü’l-haram sene 1180.