İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 209 Hüküm no: 188 Orijinal metin no: [88-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatya kapısı civarında, depremden yıkılan bekâr odaları, hanlar ve dükkânların enkazının temizlenmesi Samatya kapısı keşif Ma‘rûz, Mahmiye-i İstanbul’da Hacı Hüseyin mahâllesinde Samatya Kapısı ahâlîsinin istid‘âsıyla sâdır olan fermân-ı âlîlerine imtisâlen kıbel-i şer‘-i şerîfden Mehmed Emin Efendi dâ‘îleri irsâl olunup, ol dahi izzetlü Yeniçeri Ağası tarafından Tuğcu Mehmed Ağa b. Hüseyin ve Hâssa mi‘mârlarından Ser-halîfe Mehmed ve Ebubekir ve Yusuf Halîfeler ve sâir ümenâ-yı şer‘le mahâlle-i mezbûra varıp bi’l-mu‘âyene Samatya Kapısı cânib-i yemîninde dâhil-i sûrda vâki‘ müderrisîn-i kirâmdan es-Seyyid Mehmed Tahir Efendi’nin ahşabdan olan hanının ahırı devren otuz dört ve kadden on dokuz ve tûlen on bir buçuk ve arzen yine on bir buçuk zirâ‘ kapıdan on zirâ‘ ba‘îd kal‘a tabyasının derûnunda olup ve tabya-i mezkûreye muttasıl el-Hâc Mustafa tasarrufunda olan on iki bâb bekâr odaları ile yine tahtında bir ahır ve sokak aşırı Hacı Faik Câmi‘-i şerîfinin kal‘a tarafı ve tahta minâre ve câmi‘-i şerîf tahtında Kıllızâde Ahmed Bey ve Ali Bey tasarruflarında attâr ve bakkāl ve kebeci dükkânları ve fevkinde dört bekâr odaları zikr olunan tabyanın inhidâmıyla münhedim olup tarîk-i âm mu‘attal ve tahtında olan lâşenin râyihâ-i kerîhasından ve cânib-i mezkûrda vâki‘ hâric-i sûrda Arabkapısı nâm mahâlde tûlen on sekiz ve kadden on iki ve arzen on zirâ‘ yüzleme kal‘a duvarı münhedim olmağla açıkdan cârî olan kârizin mahâlli mesdûd olmağla ahâlî müteezzîler oldukları zâhir ve bâb-ı mezkûrun cânib-i yesârına muttasıl Ekmekçi iskemlesi ve çeşme ve attâr dükkânları ve Seyyid Ömer değirmeni cânib-i mezkûrda vâki‘ tabyaya varınca tûlen otuz ve kadden on iki ve arzen dört zirâ‘ yüzleme kal‘a duvarı ve sekiz hisariçe tabya-i mezkûr üzerinde iki hisariçe inhidâmıyla münhedim olduğundan mâ‘adâ mezbûr Seyid Ömer’in değirmeni dahi ittisâlinde vâki‘ hamallar sâkin olduğu Tavukçubaşı hânesini hedm, ol dahi ittisâlinde olan Ekmekçibaşı Değirmeni’ni ve ol dahi sokak aşırı kolluk olan mahâlli ve iki bâb zimmî menzillerini hedm ile cânib-i mezkûrda olan tarîki meşgūl ve sed etmekle tefrîğ ve tathîr olunmağa muhtâc olduğunu mezbûr dâ‘îleri mahâllinde tahrîr ve gelip inhâ eylediği imtisalen li’l-emri’l-âlî huzûr-ı âlîlerine i‘lâm olundu. Bâkī emr ü fermân hazret-i men-lehü’l-emrindir. Fî 26 Zilhicce sene [1]179.