İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 208 Hüküm no: 187 Orijinal metin no: [88-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar İbrahim’in sermayesini alarak ortalıktan kaybolan ve İbrail’de bulunduğu bildirilen gemici Şahinoğlu Mehmed’in hapis ve paranın tahsil olunması Kapan tüccârı sermâye için Ma‘rûz, Sâdır olan fermân-ı âlî[ye] imtisâlen işbu arzuhâl ve derkenâra nazar olundukda Kapan tüccârından sâhib-i arzuhâl el-Hâc İbrahim şerîki Kolonoğlu el-Hâc Mehmed yediyle Laz tâifesinden Şahinoğlu Mehmed nâm reise iki bin elli guruş sermâye verip ol dahi Tuna sevâhilinden sefînesine hınta tahmîl ve İstanbul’a getirmek lâzım iken kendi vilâyetine gidip ve kendüyü ihfâ ve sefînesinin âlâtını bir âhar sefînesine koyup ve bir gayrı reis ile üç sene[den] beri sermâye-i mezkûreyi i‘mâl ve hâlâ İbrail iskelesinde merbût olup ve şurût-ı nizâmları bu makūle hilâf-ı emr-i âlî hîle ile mal-ı tüccârı itlâf eden reis bulunduğu mahâllinde ahz ve Âsitâneye ihzâr ve ta‘zîr-i şedîd ve habs-i medîd ile habs ve ta‘zîr ve ta‘addîsinden nâşî itlâf ve izâ‘at eylediği sermâyeyi sâhibine teslîm ve edâ etmedikçe ıtlâk olunmayıp eğer edâda mümâtale ve ta‘annüt eder ise mâl ve sefînesi bey‘ ve semeninden kendüye edâ-yı deyn etdirilmek üzere düstûrü’l-amel olmağla sâhib-i arzuhâl el-Hâc İbrahim şerîki mezbûr el-Hâc Mehmed hâlâ İbrail’de olduğuna binâen husûs-ı mezkûr için tarafından kabûlüne mevkūfe mezbûr el-Hâc Mehmed’i tevkîl edip ve şurût-ı mezkûre üzere reis-i mezbûr Mehmed bulunduğu mahâlde ahz ve sefînesi merbût olan İbrail’e ihzâr ve vekîli mezbûr ile İbrail nâzırı ve yeniçeri zâbiti ma‘rifetiyle kādısı huzûrunda murâfa‘a ve eğer mezkûr sermâyeyi edâda mümâtale ederse mal ve sefînesi bey‘ ve kendüye edâ-yı deyn etdirilip mahâll-i mezkûrda mezbûrun husûsuna temşiyet verilmek bâbında İbrail kādısına ve nâzırı ve yeniçeri zâbitine hitâben fermân-ı âlîleri sudûrunu mezbûr el-Hâc İbrahim istid‘â eylediği huzûr-ı âlîlerine i‘lâm olundu. Fî 23 min-M sene [11]80.