İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 210 Hüküm no: 190 Orijinal metin no: [89-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İnşa edilen menzilin Kazasker Abdülkadir Efendi Zaviyesine olan zararının giderilmesi Keçeci Pîrî mahâllesinde keşif Ma‘rûz, Bi’l-iltimâs kıbel-i şer‘-i şerîfden mürsel keşif nâibimiz müderrisîn-i kirâmdan es-Seyyid Halil Efendi dâ‘îleri Hâssa mi‘mârlarından Hasan Halîfe ve sâir Müslimîn ile Edirnekapısı dâhilinde Keçeci Pîrî mahâllesinde vâki‘ gallesi mahâlle-i mezbûre müezzinine meşrûta vakıf ve rub‘u Fâtıma bt. Mehmed ve selâse-i erbâ‘ı Süleyman b. Halil nâm kimesne tasarrufunda olan menzile varıp akdeylediği meclis-i şer‘-i şerîfde menzil-i mezkûr civârında ashâb-ı hayrâtdan merhûm ve mağfûrun-leh Kazasker-i esbak Abdülkadir Efendi Zâviyesi’nde hâlâ şeyh olmağla zâviye-i mezbûrenin hareminde sâkin olan İsmail Efendi b. Ahmed zâviye-i mezbûrenin mütevellîsi olan Kethüdâ-i hazret-i veliyyü’n-ni‘amî es-Seyyid Mehmed Mustafa Efendi tarafından vekîl-i şer‘îsi İbrahim Ağa hâzır olduğu hâlde mu‘arrefetü’z-zât mezbûre Hadîce[Fâtıma] ve mezbûr Süleyman ile terâfu‘larında mezbûrânın ihdâs eylediği menzilinin ulyâ ve süflâ şehnişîni pencerelerinden şeyh-i mûmâ-ileyhin menzilinin makarr-ı nisvân olan yan penceresi görünüp havâlesi olmağla def‘ eylesin deyü ba‘de’d-da‘vâ ve’l-mu‘âyene ve’l-ikrâr mûcebiyle havâlesini def‘a mezbûrâna tenbîh olundukdan sonra zâviye-i mezbûrenin taşra havlusunda mezbûrânın ihdâs eyledikleri sofa ve dehliz pencerelerinden kendilerinin makarr-ı nisvân olan mevâzi‘i görünüp şer‘an sütre vaz‘ olunmak lâzım gelmekle ber-vech-i muharrer sütre vaz‘ı için mezbûrâna tekrâr tenbîh olundukda onlar dahi ber-vech-i muharrer zikr olunan pencerelere sütre vaz‘ına ta‘ahhüd eylediklerini mezbûr dâ‘îleri mahâllinde tahrîr ve gelip alâ-vukū‘ihî inhâ eylediği bi’l-iltimâs huzûr-ı âlîlerine i‘lâm olundu. Fî 25 M sene [1]180.