İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 211 Hüküm no: 191 Orijinal metin no: [89-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yüznaz Ali’nin varislerinin Ahmed b. Osman aleyhindeki tarla davasında anlaşma sağlanması Çatak nâm karye ahâlîsinden mîrâs Ma‘rûz, Bolu sancağında Devrek kazâsına tâbi‘ Çatak nâm karye ahâlîsinden iken mukaddemâ fevt olan Pürnaz? Ali nâm kimesnenin verâseti sulbî kebîr oğulları Mustafa ve Hasan’a münhasıra mezbûr Mustafa dahi fevt olup verâseti oğlu el-Hâc Ali’ye münhasıra mezbûr Hasan dahi fevt olup verâseti sulbî kebîr oğlu Hüseyin’e münhasıra mezbûr Hüseyin dahi bu esnâda fevt olup verâseti ashâb-ı arzuhâlden zevcesi Ümmügülsüm ile sulbî kebîr oğlu İsmail ve sulbiye sagīre kızı Rukıye’ye münhasıra olduğu tahakkukundan sonra mezbûr İsmail asâleten ve sagīre-i mezbûrenin vasîsi olan mu‘arrefetü’z-zât mezbûre Ümmügülsüm vesâyeten ve mezbûr el-Hâc Ali dahi asâleten Çarşamba günü Arz Odası’nda huzûr-ı âlîlerinde ma‘kūd meclis-i şer‘-i enverde zikri âtî tarla ve eşcâra vâzı‘ü’l-yed olan arzuhâlde mezkûr Kādıoğlu demekle ma‘rûf Ahmed b. Osman mahzarında karye-i mezbûre arazisinden Yörükderesi demekle ma‘rûf lede’l-ahâlî ma‘lûmetü’l-hudûd tarla <> ve içinde mağrûs iki yüz aded mülk elma ve armud eşcârı ve bir tahta bıçkısı müteveffâ-yı evvel-i merkūm Pürnaz? Ali’nin tasarrufunda ve ba‘de-vefâtihim mezkûr tarla evlâd-ı zükûruna intikāl ve eşcâr-ı mezkûre dahi kırk sekiz sehim i‘tibârıyla yirmi dört sehmi mezbûr el-Hâc Ali’ye ve yirmi dört sehmi dahi bize mevrûs olmuş iken mezbûr Ahmed beş seneden beri bi-gayrı hakkın vaz‘-ı yed ve zikr olunan bıçkıyı bozup yerine su değirmeni [90] binâ etmekle her birimiz hisselerimizi taleb ederiz deyü da‘vâ ve mezbûr Ahmed cevâbında müdde‘iyûn-ı mezbûrûnun benden iddi‘â eyledikleri mahâll-i mezkûr orman ve arz-ı mevâddan olmağla sipâhîsi izniyle ben kendi baltam ile açıp ihyâ ve üzerine zikr olunan değirmeni binâ ve kırk seneden mütecâviz müdde‘ûn-ı mezbûrûnun mûrisleri muvâcehelerinde bilâ-nizâ‘ tasarruf edegelmişimdir deyü def‘ini beyan için vilâyetinden senedlerini ve sâhib-i arz vekîlini ihzârına tevkīf olunmuş idi. Hâlâ mezbûr Ahmed dâ‘îhâneye gelip zikr olunan müdde‘îler muvâcehelerinde mezkûr tarlanın değirmen olan mahâlli kendinde kalıp ve mâ‘adâ nısfını eşcârıyla bâ-ma‘rifet-i sâhib-i arz rızâsıyla bi-kadri’l-hısasi’l-merkūme müdde‘iyûn-ı mezbûrûna verip ve mahâllinde kabza taslît ve da‘vâsından zimmetlerini ibrâ ve irzâ etdikde onlar dahi mezbûrun yedinde kalan nısf tarlaya ve bıçkıya müte‘allıka âmme-i da‘vâdan mezbûr Ahmed’in kezalik zimmetini ibrâ ve kat‘-ı münâza‘a eyledikleri rızâlarıyla tescîl olunduğu mübâşiri iltimâsıyla huzûr-ı âlîlerine i‘lâm olundu. Fî 25 Muharrem sene [11]80.