İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 212 Hüküm no: 193 Orijinal metin no: [90-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremden zarar gören Galata’daki kayıkhane ve kayıkçı odalarının tamir olunması Galata Balıkpazarı kurbünde keşif Ma‘rûz, Sâdır olan fermân-ı âlîlerine imtisâlen kıbel-i şer‘-i şerîfden Mehmed Emin Efendi dâ‘îleri irsâl, ol dahi hâssa mi‘mârlarından Abdullah ve İsmail Halîfeler ve sâir ümenâ-yı şer‘le mahrûse-i Galata sâhilinde Balıkpazarı kurbünde vâki‘ nezâret-i dâ‘îlerinde olan evkāfdan Şeyh Sinan Erdebilî Vakfı’ndan zikri âtî kayıkhâne ve fevkinde mebnâ kayıkçılar sâkin olduğu odalara varıp akdeylediği meclis-i şer‘-i şerîfde mezkûr kayıkhâneye şerîkleri ile mutasarrıflar olan sâhib-i arzuhâl el-Hâc İbrahim ve el-Hâc İsmail işbu mu‘âyene olunan kayıkhâne ve fevkinde olan on bir bâb odalar sebkat eden zelzeleden altısı münhedim ve beşi dahi inhidâma mâil olmağla keşif ve rü’yet olunup kadîmîsi üzere mütevellîsi izniyle binâsına ruhsat verilmek matlûbumuzdur dediklerinde mi‘mârân-ı mezbûrân ma‘rifetleriyle mu‘âyene olundukda fi’l-vâki‘ mârrü’z-zikr kayıkhâne ve ol mikdâr odalarının altısı münhedim ve beşi dahi inhidâma mâil olup ta‘mîre muhtâc olduğunu bi’l-müşâhede ba‘de’l-ihbâr ahâlîden dahi istihbâr eyledikde zikr olunan kayıkhâne ve odalar kemâ-fi’l-evvel ta‘mîr olunduğu sûretde kimesneye zarârı yokdur dediklerini mezbûr dâ‘îleri mahâllinde tahrîr ve gelip inhâ eylediği huzûr-ı âlîlerine i‘lâm olundu. Fî 21 Muharrem sene 1180.