İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 212 Hüküm no: 192 Orijinal metin no: [90-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miri ambarda bulunan şekerin Mısır Çarşısı, şerbetçi ve akideci esnafına ücreti karşılığında satılması Mîrî anbarında olan şeker akīdecilere tevzî‘ Ma‘rûz, Bahçekapısı hâricinde vâki‘ mîrî anbarda ta‘yînât için Matbâh Emîni ağa kullarının selefinden makbûzu olan on bir bin dört yüz elli bir vakiye ocaklık şekerinin mahfûz olduğu mahâlde âb-zede ve meblûl ve telef olacağı melhûz olan yedi bin beş yüz altmış dört vakiye şekeri sa‘âdetlü defterdâr efendi telhîsiyle Gümrük Emîni ağa ma‘rifetiyle fîsi takdîr ve akīdeci ve şerbetçi esnâfına tevzî‘ olunmak bâbında fermân-ı âlî sâdır olup lâkin şeker tevzî‘i iktizâ etdikde Mısır çarşısı ve şerbetçi ve akīdeciye bâ-fermân-ı âlî ta‘yîn olunan sihâm-ı ma‘lûme üzere taksîm olunmağla işbu esnâf-ı selâse kethüdâları ve yiğitbaşıları ve ustaları ihzâr ve gümrük Emîni Ağa’nın ma‘rifetiyle ahz olunan numûnesi irâet olundukda Mısır Çarşısı yetmiş yedi senesinde aldığımız fî üzere semeni on beş ay tamâmına dek üç taksîd ile verilmek şartıyla on yedişer guruşa cânib-i mîrîyi sıyâneten iştirâ ederiz demeleriyle akīdeci ve şerbetçi esnâfı dahi bu minvâl üzere râzılar olup şirâsına tâlib oldukları ber-mûceb-i fermân-ı âlîşân huzûr-ı âlîlerine i‘lâm olundu. Fî 26 Muharrem sene 1180.