İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 213 Hüküm no: 195 Orijinal metin no: [91-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatya’da Yusuf ve Halil’in tasarrufunda olan değirmen ile Hacı Faik Camii ve Hacı Mehmed Çeşmesi’nin yapılabilmesi için öncelikle yıkılan kale duvarının tamir olunması Samatya’dan değirmen Ma‘rûz, Arzuhâlde mezkûr Yusuf Efendi ve el-Hâc Halil nâm kimesneler tasarruflarında olup Samatya hâricinde kal‘a cidârı ittisâlinde vâki‘ dört horos değirmenin müstecirleri arzuhâl eden es-Seyyid Ömer ve Memiş ve Ovannes meclis-i şer‘-i şerîfe gelip cidâr-ı kal‘a zelzeleden münhedim oldukda zikr olunan değirmen ile kurbünde vâki‘ Hacı Faik Câmi‘-i şerîfi ve Arpacı el-Hâc Mehmed Vakfı Çeşmeyi ve bir attâr ve bir bakkāl dükkânını ve Silivri kapısı’ndan gelen kebîr lağımı tahrîb ve enkāzı işgāl etdikde mutasarrıfları mezbûrân cidâr-ı kal‘a binâ olunmadıkça değirmenimiz yapılmaz deyü binâdan ibâ etmeleriyle kapandan hissemize isâbet eden hıntayı hıfza bir âhar mahâllimiz olmamağla telef olup bâ‘is-i hasâretimiz olur deyü inhâlarına binâen mahâll-i mezkûr ahâlîsinden hâzirûn bi’l-meclis olan Müslimînden istihbâr olundukda fi’l-vâki‘ mezkûr değirmen ve dükkânlar ile malımızdan i‘ânet ile binâsını murâd etdiğimiz câmi‘-i şerîf ve çeşmenin yapılması mümkün olmayıp cidâr-ı kal‘anın binâsına mevkūf olduğunu ihbâr ve cidâr-ı kal‘anın mukaddemce binâ buyrulmasını istirhâm ve istid‘â etmeleriyle fi’l-hakīka ol havâlîde rahne-yâb olan cidârân-ı kal‘adan bundan binâsı mühim mahâl olmamağla ol mahâlde olan ibâdullaha şefkaten ve evkāf-ı şerîfeye hürmeten binâsına mübâderet etmek üzere binâ emîni kullarına fermân-ı âlîleri sudûru ile nâil-i ecr ve sevâb olacak emr-i hayr ve savâb olduğu huzûr-ı âlîlerine i‘lâm olundu. Fî 28 Muharrem sene [11]80.