İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 215 Hüküm no: 198 Orijinal metin no: [91-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat kayıkçılarının, başkethüdaları olan Mehmed’den şikâyette bulunmaları Balat kayıkçıları nizâmı Ma‘rûz, Arzuhâl eden Balat kayıkçılarından Hasan ve İbrahim ve Ali ve diğer İbrahim ve diğer İbrahim ve Mustafa ve Osman ve es-Seyyid Feyzullah ve Mehmed ve Abdi ve el-Hâc Hüseyin ve diğer İbrahim ve Mehmed ve İsmail ve diğer İsmail ve Abdurrahman [92] ve diğer İbrahim ve diğer Abdurrahman ve Ali ve Ahmed ve es-Seyyid İbrahim ve Yunus ve Hüseyin ve Ahmed ve Mehmed ve Hüseyin ve Yahûd tâifesinden Avram ve Mosi ve İsak ve Bako başkethüdâları olan arzuhâlde mezkûr Mehmed ile terâfu‘larında mezbûr Mehmed kendi hâlinde olmayıp öteden beri Tersâne-i âmire’ye kürek akçesi için veregeldiğimiz hissemizi üzerimize ziyâde tahmîl ve şâkirdimizden otuzar ve kırkar guruş aldığından mâ‘adâ ve ba‘zı hâm-dest kimesnelerden dahi akçe alıp iskelemize kayıkçı ta‘yîn ve yirmi iki seneden beri göç-i hümâyûn vukū‘unda bize atiyye buyrulan surremizi ve vermeyip bize gadr ve zulm eder deyü teşekkî etdiklerinde ol dahi fîmâ-ba‘d mezbûrûnun gerek tevzî‘lerine ve gerek iskele-i mezbûrede ihrâç ve idhâllerine aslâ karışmayıp sâir iskelelerde olageldiği minvâl üzere tarafından tevkîl eylediği hâzır bi’l-meclis diğer Mehmed ma‘rifetiyle idâreye ta‘ahhüd etdikde onlar dahi bu vechile vekîl-i mezbûr Mehmed ma‘rifetiyle idâresine râzılar olup lâkin mezbûr Başkethüdâ Mehmed anûd ve mütemerrid olmağla bundan böyle yine mezbûrûnun umûr ve husûslarına karışıp zulm ve ta‘addî ederse hakkından gelinmek üzere fermân-ı âlîleri sudûrunu istid‘â eyledikleri Mumcu Mehmed Beşe iltimâsıyla huzûr-ı âlîlerine i‘lâm olundu. Fî 28 M sene [11]80.