İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 215 Hüküm no: 199 Orijinal metin no: [92-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çürükçü esnafının iskele önündeki meydana kurutmak için arpa ve buğday sermeyeceklerine dair taahhütte bulunmaları Çürükçüler ta‘ahhüdü Ma‘rûz, Ashâb-ı arzuhâl Unkapanı tüccârından el-Hâc İsmail ve el-Hâc Ahmed ve el-Hâc Bekir ve el-Hâc Mahmud ve Reisler Kethüdâsı el-Hâc Hasan ve Ekmekçiler Kethüdâsı Mehmed Emin ve Ahmed Çelebi ve Hasan Usta ve Molla Hasan ve Arpacılar Kethüdâsı Mehmed ve Mehmed Bey ve Hamallar Kethüdâsı es-Seyyid Mehmed ve Ali ve İsmail izzetlü Yeniçeri Ağası ma‘rifetiyle meclis-i şer‘-i şerîfe ihzâr etdirdikleri Çürükçü ta‘bîr olunur tâifeden es-Seyyid Hüseyin ve Ali ve Mahmud ile terâfu‘larında Kapan İskelesi önünde vâki‘ gemiler yanaşdığı meydan tüccâr ve gemiler ve arpacılar ve hamallar ve sâir ibâdullahın mesâlihi için ad ve terk olunmuş iken mezbûrûn Hüseyin ve Ali ve Mahmud ve refîkleri gemilerden aldıkları çürük buğday ve arpa ve darılarını leyl ü nehâr mahâll-i mezkûr[a] kurumak için yayıp işgāl ve bi’l-külliye ibtâl etmeleriyle ibâdullaha mesâlihini görmeğe tazyîk ederler deyü teşekkî etdiklerinde onlar dahi fî-mâ-ba‘d mahâll-i mezkûru vech-i meşrûh üzere işgāl ve ibtâl etmeyip metâ‘larını bir gayrı hâlî mahâlle vaz‘a ta‘ahhüd eyledikleri huzûr-ı âlîlerine i‘lâm olundu. Fî-selhi Muharremü’l-haram sene 1180.