İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 219 Hüküm no: 207 Orijinal metin no: [94-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peyk Mehmed Ağa’nın, Yorgancı İsmail Çelebi’nin evine olan zararını gidermek hususunda taahhütte bulunması Avratpazarı kurbünde keşif Ma‘rûz, Sâdır olan fermân-ı âlîlerine imtisâlen savb-ı şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Ahmed Halîfe ile Avratpazarı kurbünde Canbâziye mahâllesinde vâki‘ Canbâz Mustafa Bey Vakfı’ndan Peyk Mehmed Ağa b. Süleyman tasarrufunda olan menzile varıp akdeylediği meclis-i şer‘-i şerîfde menzil-i mezkûr civârında bir bâb menzile mutasarrıf olan arzuhâlde mezkûrü’l-ism Yorganî İsmail Çelebi b. Abdullah mezbûr Mehmed Ağa muvâcehesinde mezbûr Mehmed Ağa’nın işbu esnâda ta‘mîr ve binâ eylediği menzili sofasının muhdes pencerelerinden yine vakf-ı mezbûrdan tasarrufumda olan menzilin makarr-ı nisvân olan oda ve sofasına havâle zarârı olmağla def‘ eylesin deyü iddi‘âsına binâen nazar olundukda fi’l-vâki‘ zikr olunan yedi aded pencerelerin müdde‘î-i mezbûrun menziline havâle zarârı zâhir oldukdan sonra beynlerinde müşterek olan taş duvar üzerine tahta perde ile mezbûr Peyk Mehmed Ağa havâlesini def‘a ta‘ahhüd eyledikde merkūm İsmail dahi râzı olup bu vechile kat‘-ı nizâ‘ eylediklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 18 M sene [1]180.