İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 219 Hüküm no: 206 Orijinal metin no: [94-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahve tüccarının kahve fiyatına riayet edeceklerine dair taahhütte bulunmaları Bu husûs için fermân iki varak sonra mukayyeddir. Mısır tüccârlarından kahve bazergânlarının ta‘ahhüdü Ma‘rûz, Bu def‘a kahve husûsu için bu dâ‘îlerine ve Gümrük Emîni ağaya hitâben fermân-ı âlî sâdır olmağla kahve bazergânları ve Mısır çarşısı attârları meclis-i şer‘-i şerîfe ihzâr ve fermân-ı âlîşân muvâcehelerinde feth ü kırâet olundukda her biri mazmûn-ı emr-i âlîşân üzere yüz vakiyesini yüz seksen guruşa vermeğe rızâ gösterip lâkin içlerinden ba‘zılarının Mısır’da aldıkları kahvenin her kantarı yirmi altı riyâlden ziyâdeye olup ve masârıfı husûsunda dahi ba‘zı mertebe tefâvüt iddi‘âsıyla bize yetmiş beş guruşa oldu deyü beş guruş fâide ile yüz seksen guruşa verdiğimiz takdîrce her kıyyede ikişer para fâiz hâsıl olup ve attârân meshûkunun yirmi beş dirhemini on dokuz akçeye bey‘ ile her kıyyesinde dörder para fâide etmeleriyle bu sûretde bize fâide-i kalîle hâsıla olur deyü istirhâm etmeleriyle attârânın şimdilik dörder para fâidelerinden birer parasını tenkīs ve bazergânların fâidelerine zam ile ta‘dîl olundukda her yüz kıyyesi seksen ikişer buçuk guruşa gelip ve bu minvâl üzere tarafeyn müsâ‘ade buyrulmasını istid‘â ve fî-mâ-ba‘d berrânî kahvesini noksân baha ile kendüleri iştirâ ve devretmemek ve bundan noksâna içlerinden bey‘ eder olur ise niçin noksâna verdin deyü muâhaze olunmamak ve bundan mukaddem kendülere verilen i‘lâmın şurûtuna mürâ‘ât olunmak ve bundan sonra tenzîl kabûl eylediğinde aslâ te’hîr etmeyip haber vermek üzere bazergânlardan her biri ta‘ahhüd etmeleriyle ma‘lûm-ı devletleri buyruldukda müsted‘âları olan iki buçuk guruşa şimdilik müsâ‘ade ve ruhsat buyurmalarında emr ü fermân hazret-i veliyyü’l-emrindir. Fî 5 Safer sene 1180