İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 220 Hüküm no: 209 Orijinal metin no: [95-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Naziki Hatun Vakfı mütevellileri Mehmed Nurullah ve Emetullah Hatun’un, Mütevelli Kaymakamı İmam Ali Hancısı İsmail’in zimmetini ibra etmeleri Nâziki Hatun Vakfı’nın nizâ‘ı Ma‘rûz Nezâret-i dâ‘îlerinde olan evkāfdan Naziki Hatun Vakfı mütevellîleri ashâb-ı arzuhâlden Mehmed Nurullah asâleten ve Emetullah nâm hatun tarafından husûs-ı âti’z-zikrde vekîl-i sâbitü’l-vekâlesi Hüseyin Efendi vekâleten ve Âişe nâm hatun tarafından kezâlik vekîl olan müderrisîn-i kirâmdan es-Seyyid Mehmed Efendi dahi vekâleten ve Hafize nâm hatun tarafından kezâlik vekîl olan kuzâtdan Mesud Efendi dahi vekâleten meclis-i şer‘-i hatîrde vakf-ı mezkûrdan Mercan Çarşısı’nda vâki‘ İmam Ali Hanı demekle ma‘rûf Han’ın Hancısı ve vakf-ı mezkûra bundan akdem kāimmakām-ı mütevellî olan el-Hâc İsmail ile terâfu‘larında mezbûr el-Hâc İsmail’in yedinde olan muhâsebe defterleri ve hücec-i şer‘iyye ve mütevellîyeleri temessükü mantûkunca han-ı mezkûrun masârıfına malından vakfına bi-şarti’r-rücû‘ bin yedi yüz doksan iki guruş ve hâric ez-defter binâ eylediği dört oda üç sofa masârıfından bin iki yüz guruş ki cem‘an iki bin dokuz yüz doksan iki guruş iddi‘â ve mezbûrûn dahi mezbûr el-Hâc İsmail han-ı mezkûrun oda ve dükkânlarının her şehr yüz otuz beş guruş icâresi var iken yetmiş sekiz Şa‘bânı’na gelince on iki sene her şehr yetmişer guruşa isticâr etmekle ecr-i mislini tekmîl eylesin deyü iddi‘â ve Müslimîn tavassutuyla mezbûr el-Hâc İsmail iddi‘â eylediği iki bin dokuz yüz doksan iki guruşa ve sinîn-i mezkûrede temessük akçesi nâmıyla mütevellîyelere verdiği akçeye ve masârıf-ı sâiresine müte‘allıka âmme-i da‘vâdan cânib-i vakf-ı mezkûru ve zimmet-i mütevellîyeleri ibrâ etdikde onlar dahi ibrâsını kabûl ve han-ı mezkûrun icâresine müte‘allıka da‘vâdan kezâlik mezbûr el-Hâc İsmail’in zimmetini ibrâ ve iskāt ve kat‘-ı nizâ‘ eyledikleri mufassalan hüccet olunduğu mübâşiri Hüseyin Çavuş kulları iltimâsıyla huzûr-ı âlîlerine i‘lâm olundu. Fî 7 Safer sene 1180.