İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 221 Hüküm no: 210 Orijinal metin no: [95-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piço v. Hıristo’nun mumcular esnaflığından ihrâç olunması Mumculuk esnâfından ihrâç Ma‘rûz, Mahmiye-i İslambol’da Mumcular Esnâfı Kethüdâsı İbrahim ve Hüseyin ve yiğitbaşıları diğer İbrahim Eğrikapı’da Mumcu olup meclis-i şer‘-i şerîfe ihzâr etdirdikleri Piço v. Hıristo nâm zimmî kendi hâlinde olmayıp müzevvir ve hîlekâ[r] olmağla ba‘zılarının gediklerine benimdir deyü sâhib çıkıp ve ba‘zılarından akçe alıp gediğim vardır deyü müzevver temessükler peydâ ve irhân ve ba‘dehû inkâr ve ba‘zılarına iftirâ edip esnâfımız beynine nizâmımızın hilâfı ilkā-yı fesâd etmekle şer ve mazarrâtından bir vechile emniyetimiz olmayıp hattâ merkūm Piço yedimizde olan müte‘addid i‘lâmlar mantûkunca bundan akdem te’dîb için üç def‘a küreğe ve birkaç def‘a zindana vaz‘ olunup bir vechile te’dîb olunmamağla ef‘âl-i sâbıkāsında musırr u mükibb olduğu ecilden bu def‘a dahi hareket-i nâ-marziyesine bir tarîk ile tahammülümüz kalmamağla şerr ü mazarrâtı def‘ olunmak için esnâf-ı mezkûreden tard ve ib‘âd olunmak matlubumuzdur deyü teşekkî ve mumcu ustalarından Osman ve Yusuf ve Molla Ahmed ve Yakub ve Halil ve Hasan ve Kasım ve Süleyman ve diğer Osman ve Hüseyin ve diğer Hüseyin ve Ali ve Eyüblü Mehmed ve diğer Süleyman ve Salih ve Kasımpaşalı Süleyman meclis-i şer‘-i şerîfe hâzirûn olup fi’l-hakīka merkūm Piço müfsid ve müzevvir olup yed ve lisânından adem-i emniyetlerini muvâcehesinde ihbâr ve içlerinden ihrâç olunmasını istid‘â [96] eyledikleri iltimâslarıyla huzûr-ı âlîlerine i‘lâm olundu. Bâkī emr ü fermân hazret-i veliyyü’l-emrindir. Fî 7 Safer sene 1180.