İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 226 Hüküm no: 216 Orijinal metin no: [98-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman ve Yahudi kâğıtçı esnafı arasında kâğıt alım ve satımı hususunda anlaşma sağlanması Müslim ile Yahûdî kâğıdçıları nizâmı Ma‘rûz, Âsitâne-i aliyye’de Haşebî çârçûbe kâğıdı bey‘ eden Yahûd tâifesinden arzuhâl eden Mosi ve Hayim ve Kamal ve Sabatay ve Yako ve diğer Mosi ve Yuda ve Hayim ve İsak ve Avram ve Yuda ve diğer Mosi Çarşamba günü Arz [Oda]sında huzûr-ı âlîlerinde ma‘kūd meclis-i şer‘-i şerîfde kâğıdcılar esnâfı kethüdâsı Mehmed Ağa ve Kâğıdçıbaşı diğer Mehmed ve yiğitbaşıları İsmail ve ustalarından Kethüdâ Vekîli el-Hâc Osman ve İbrahim Ağa ve Yahya Efendi ve Mehmed Odabaşı ve el-Hâc Ömer ve Feyzullah Çelebi ve el-Hâc Ali ve Ahmed Ağa ve el-Hâc Abdullah ile terâfu‘larında işbu yedimizde olan i‘lâm mantûkunca bin yüz kırk târîhinde ehl-i İslâm kâğıdçılarıyla beynimizde olan nizâm-ı cedîdimiz, bey‘i bize mahsûs kılınan haşebî ve çârçûbe kâğıdından mâ‘adâ Efrenç tarafından gelen mühresiz yazı kâğıdı dört hisse i‘tibâr olunup rub‘u bizim için ve selâse-i erbâ‘ı ehl-i İslâm için a‘dâd olunup ba‘de’l-iştirâ yine ol meclisde beynimizde özbe? ta‘bîr olunur her top kâğıd başına birer para fâiz ile İslâm ustalarına bey‘ edip eğer birer para fâiz ile kabûl etmezler ise ol meclisde hissemizi kaldırıp dilediğimiz mahâlde bey‘ etmek üzere mukāvele olunmuş idi. Lâkin biz bir müddetden beri şurût-ı mezkûre mensî olup ehl-i İslâm ustalar murâ‘ât etmeyip ve yine işbu yedimizde olup bin altmış dört ve bin yüz dört târîhleriyle müverrah mukāvele hücceti ve fermân-ı âlîşân mantûkunca atik nizâmımız üç hisse i‘tibâr olunup ve fâiz şartı [99] olmamağla fî-mâ-ba‘d dahi Efrenç tarafından gelen yazı kâğıdı atik nizâmımız üzere üç hisse i‘tibârı düstûrü’l-amel tutulup biz bir hissemizi kâğıd geldikde alıp dilediğimiz mahâlde bey‘ etmek murâdımızdır dediklerinde yedlerinde olan hüccet-i mezkûreye nazar olundukda ol târîhde beynlerinde olan mukāveleyi nâtık olup ve ba‘dehû yüz kırk târîhinde olan musâlahalarıyla ibtâl olunup ve ehl-i İslâm ustaları dahi tâife-i mezbûrenin nizâm-ı atiklerine râzılar olmamağla nizâm-ı cedîdleri üzere yine dört bahş i‘tibârıyla bir bahşı tâife-i mersûme için a‘dâd ve ba‘de’l-iştirâ birer para fâiz ile mersûmûndan alıp bu vechile kâr ü kisblerine mümâna‘at etmemek üzere rızâlarıyla ta‘ahhüd etdiklerinde nizâmları dahi bu vechile re’y buyrulup tarafeyne ve ibâdullaha enfa‘ olmağla vech-i meşrûh üzere tâife-i mersûmûn dahi râzılar olmalarıyla fî-mâ-ba‘d dahi inkıtâ‘-ı nizâ‘ları için bu nizâm mahâlline kayd ve yedlerine tuğrâlı emr-i âlîşân ihsân buyrulmak bâbında emr ü fermân hazret-i veliyyü’l-emrindir. Fî 9 Safer sene [11]80.