İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 225 Hüküm no: 215 Orijinal metin no: [98-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Anderyas’ın varislerinin alacak iddialarıyla ilgili izhar Hukūk da‘vâsıyla ihzâr Ma‘rûz, Habbâz tâifesinden hâmil-i arzuhâl kendi tarafından asıl ve kız karındaşı evlâdı Sahak ve Karabet ve Rosya nâm sagīrlerin vasîsi olan Kirkor’un arzuhâlinde mezkûr olduğu vech üzere Hırşova kazâsına tâbi‘ Depeköyü nâm karye ahâlîsinden iken bundan akdem hâlik olan Toma nâm zimmînin kebîr oğulları olmağla terekesine vaz‘-ı yed edenlerden Ohan ve Serkiz ve diğer Kirkor zimmetlerinde babası Anderyas nâm zimmînin altı bin guruş alacak hakkı olup kable’l-ahz hâlik olup merkūmûna mevrûs olmağla merkūmûn Ohan ve Serkiz ve diğer Kirkor bundan akdem Âsitâne’ye gelip verese-i merkūmûna deynleri olduğunu ba‘de’l-ikrâr ve’l-işhâd yine vilâyetleri olan karye-i mezbûreye gidip inkâr ve edâda mümâtale ve bunların dahi şâhidleri Âsitâne’de olup karye-i mezbûreye gider makūlesinden olmamağla merkūmûn Ohan ve Serkiz ve diğer Kirkor’un işbu arzuhâlleriyle Âsitâne’ye ihzârlarını istid‘â etmeleriyle sâdır olan fermân-ı âlîlerine imtisâlen hakīkat-i hâl habbâz tâifesinden ve sâir vukūfu olanlardan istihbâr olundukda husûs-ı mezkûr tezvîr olmayıp ancak mahâllinde ityân-ı beyyineden aczleri olup ve mesfûrların a‘yân-ı beldeden müstenidleri dahi olmağla ihkāk-ı [hak] mümkün olmamak havfından istid‘â eylediklerini haber vermeleriyle hâmil-i arzuhâlin hasımları olan merkūmûn Ohan ve Serkiz ve diğer Kirkor’un zikr olunan Depe nâm karyeden çavuş kuları ma‘rifetleriyle Âsitâne’ye ihzâr ve Arz Odası’nda huzûr-ı âlîlerinde terâfu‘-i şer‘-i şerîf ve ihkāk-ı hak olunmak bâbında emr u fermân hazret-i men-lehü’l-emrindir. Fî 9 Safer sene [11]80.