İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 228 Hüküm no: 220 Orijinal metin no: [100-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Yorgi’nin, Nikola v. Andol ile ortaklığını feshettiği ve aleyhindeki alacak davasında anlaşması Kerestecilik şirketi’nden sulh Ma‘rûz, Balat’da keresteci hâmil-i arzuhâl Yorgi v. Nikola meclis-i şer‘-i hatîrde şerîki diğer Nikola v. Andol muvâcehesinde merkūm Nikola ile kerestecilik san‘atında şirket-i sahîha ile beş sene şerîk olup geçen sene şehr-i Rebî‘ülevveli’nde hesâb gördüğümüzde mâl-ı şirketimizi fâizinden husûma [hisseme] isâbet eden üç yüz seksen sekiz guruş hakkımı ahz ve istihlâk etmekle taleb ederim deyü da‘vâ, ol dahi cevâbında meblağ-ı mezkûru istihlâkini ikrâr, lâkin müdde‘î-i merkūm Yorgi târîh-i mezkûrda meblağ-ı [mezbûr] üç yüz seksen sekiz guruşun mutâlebesinden zimmetimi ibrâ etmiş idi deyü def‘ini isbâta kādir olmamağla bâ-vesâtet-i müslimîn seksen guruş bedel-i makbûz mukābelesinde merkūm Yorgi ile sulh olup ziyâde üç yüz sekiz guruşa müte‘allıka da‘vâdan merkūm Nikola’nın zimmetini ibrâ-i âm [ile] ibrâ ve iskāt edip kat‘-ı nizâ‘ eyledikleri mübâşiri iltimâsıyla huzûr-ı âlîlerine i‘lâm olundu. Fî 9 Safer sene [11]80.