İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 229 Hüküm no: 221 Orijinal metin no: [100-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde zarar gören Bahçekapı’daki dükkânların tamir edilmesi Bahçekapısı kurbünde keşif Ma‘rûz, Vârid olan fermân-ı âlîlerine imtisâlen savb-ı şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından el-Hâc Mustafa ve Yusuf Halîfeler ve sâir ümenâ-yı şer‘le mahmiye-i İslambol’da Bahçekapısı hâricinde Bursa Tekyesi mahâllesinde vâki‘ arsası Ayasofya-i kebîr vakfından ebniyesi Üsküdar kādıları efendiler nezâretinde olan evkāfdan Haseki İsmail Ağa nâm sâhibü’l-hayrın Üsküdar’da vâki‘ suyolları meremmâtı ve merhûm Nasuhi Efendi Zâviyesi’nde eczâ-yı şerîfe vakfı olup icâre-i vâhide icâr olunagelen bakkāl dükkânına varıp mu‘âyene olundukda zikr olunan bakkāl dükkânı ve ittisâlinde berber dükkânı ve bakkāl mahzeni ve arpacı mahzeni ve üzerlerinde ahşabdan üç bâb odalar ve mahzenin sebkat eden zelzeleden ba‘zı mahâlleri münhedim ve ba‘zı mahâlleri inhidâma mâil olup ta‘mîre muhtâc ve ta‘mîr olunmadığı sûretde dahi ziyâde harâb olup vakfa zarâr-ı küllî terettüb edeceği müte‘ayyin olmağla hâlâ vakf-ı mezbûrun kāimmakām-ı mütevellîsi sâhib-i arzuhâl Haseki el-Hâc Mustafa musakkafât-ı mezkûre galle-i vakıfdan kemâ-fi’l-evvel tecdîd ve ta‘mîr olunmak üzere kıbel-i şer‘-i şerîfden izin taleb eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî-gurreti S sene [11]80.