İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 265 Hüküm no: 272 Orijinal metin no: [123-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın Yeniçeri Odalarından Altmışıncı Beylik Kışlasına vakfettiği menzil arsasında keşif yapılması Hacı Üveys mahâllesinde keşf-i menzil Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri Hâssa mi‘mârlarından Abdullah ve es-Seyyid İsmail Halîfeler ve sâir ümenâ-yı şer‘le mahmiye-i İslambol’da Ali Paşa çarşısı kurbünde el-Hâc Üveys mahâllesinde vâki‘ bir tarafdan ba‘zan Emetullah Hatun ve ba‘zan Emine Hatun menzilleri ve bir tarafdan Ali Paşa Hamamı ve bir tarafdan gallesi mahâlle-i mezbûre imam ve müezzinine meşrûta vakıf menzil ve taraf-ı râbi‘i tarîk-i âm ile mahdûd el-Hâc Mustafa nâm sâhibü’l-hayrın dergâh-ı âlî yeniçerileri odalarından Altmışıncı Beylik Kışlası’nda gallesinden it‘âm-ı ta‘âm olunmak üzere vakfeylediği muhterik menzil arsası üzerine varıp akdeylediği meclis-i şer‘-i şerîfde vakf-ı mezbûr mütevellîsi ve sâhib-i arzuhâl Mehmed Ağa b. Osman arzuhâlde mezkûre şerîfe Rukıye Hatun bt. Halil muvâcehesinde işbu mu‘âyene olunan arsa-i mezkûreye taraf-ı vakfdan bâ-temessük mutasarrıf olan es-Seyyid Halil Efendi fevt olup menzil-i mezbûr oğlu es-Seyyid Mustafa Efendi ve kızları Şerîfe Fâtıma ve Şerîfe Rukıye Hatun’a ba‘de’l-intikāl mezbûr Mustafa Efendi dahi fevt olup oğlu diğer es-Seyyid Halil’e intikāl eyledikden sonra mezbûr Halil dahi bilâ-veled fevt olup hissesi taraf-ı vakfa âid oldukdan sonra mezbûre Şerîfe Fâtıma dahi bilâ-veled fevt olmağın arsa-i mezkûrenin sülüsân şâyi‘i taraf-ı vakfa râci‘ ve sülüs şâyi‘i mezbûre Şerîfe Rukıye Hatun’un olmağla hisselerimiz ifrâz ve ta‘yîn olunmak bi’t-tevliye matlûbumdur dedikde Emetullah Hatun ve Emine Hatun menzilleri ve Ali Paşa Hamâmı ve tarîk-i âm taraflarından iki tarafdan taş duvarı ve bi’r-i mâyı muhtevî mi‘mârân-ı merkūmân misâhaları üzere terbî‘an üç yüz altmış zirâ‘ arsa taraf-ı vakfa âid olan sülüsân hisse için alâmât-ı fâsıla vaz‘ıyla bi’t-terâzî ifrâz ve ta‘yîn ve imam ve müezzin meşrûtası ve Ali Paşa Hamamı ve tarîk-i âm taraflarından kârgîr mahzeni müştemil terbî‘an yüz seksen zirâ‘ arsa mezbûre Şerîfe Rukıye’nin sülüs hissesi için kezâlik alâmât-ı fâsıla vaz‘ıyla bi’t-terâzî ifrâz ve ta‘yîn ve tahsîs olundukda mütevellî-i merkūm Şerîfe Rukıye’den her biri hisse-i müfreze-i mezkûrelerini istifâ-yı hakkı ikrâr birle ahz ve kabûl ve ahadühümâ âharın zimmetini ibrâ ve iskāt ve her biri âharın ibrâsını kabûl eyledikleri mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 27 S sene [11]80