İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 264 Hüküm no: 271 Orijinal metin no: [122-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Halil b. Abdülkerim’in kızları Ayşe ve Rukıye’nin üvey anneleriyle menzil davasında anlaşmaları Muhsine Hatun Mahâllesi’ne menzil Ma‘rûz, Mahmiye-i İstanbul’da İbrahim Paşa Câmi‘i kurbünde Muhsine Hatun mahâllesinde sâkin iken bundan akdem vefât eden Halil b. Abdülkerim nâm kimesnenin sulbiye kebîre kızları zâtları mu‘arrefe sâhibetey-i arzuhâl Âişe ve Rukıye meclis-i şer‘-i şerîfde üvey anaları olup kezâlik mu‘arrefetü’z-zât olan Rabia bt. Abdullah mahzarında İskemleci el-Hâc Mehmed Vakfı kāimmakām mütevellîsi es-Seyyid Ömer hâzır oldukları hâlde mahâlle-i mezbûrede vâki‘ etrâf-ı erba‘ası İbrahim menzili ve es-Seyyid Salih veresesi menzilleri ve Bekir Paşa odaları ve tarîk-i hâs ile mahdûd menzilin nısf-ı şâyi‘i için vakf-ı mezkûrdan üveyi anamız mezbûre Rabia’nın üzerinde iken altmış altı senesi târîhinde babamız mezbûr Halil’e ferâğ, ol dahi kabûl edip fevt oldukda bize intikāl eyledi deyü da‘vâ, ol dahi cevâbında ferâğını ikrâr lâkin ferâğ-ı mezkûr ben ölünce görüp ve gözedip ve yüz guruş deynimi edâ etmek şartıyla olmuş idi deyü da‘vâ etmekle beynlerinde ba‘de’l-münâza‘a bâ-vesâtet-i Müslimîn mezbûre Rabia rızâsıyla mezbûretân Âişe ve Rukıye’ye yirmi altın verip ve da‘vâsından zimmetlerini ibrâ etdikde onlar dahi ahz u kabz edip menzil-i mezkûra müte‘allıka da‘vâdan mezbûre Rabia’nın zimmetini ibrâ ve iskāt ve nısf-ı şâyi‘ini yine mezbûre Rabia üzerine intikāle râzılar oldukda mütevellî-yi mezbûr dahi bu minvâl üzere re’y edip nısf-ı şâyi‘i mezbûr için yine mezbûre Rabia’nın üzerine intikāle izin verip bu minvâl üzere kat‘-ı nizâ‘ eyledikleri tescîl olunup bi’l-iltimâs huzûr-ı âlîlerine i‘lâm olundu. Fî 3 Rebî‘ülevvel sene 1180.