İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 267 Hüküm no: 276 Orijinal metin no: [124-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci İbrahim’in, köle bedelinden Ayak Berberi Süleyman’da olan alacağının tahsil olunması Esir semeninden 104 guruş istirdâd ile hüküm Ma‘rûz, Esirpazarı’nda Esirci İbrahim b. Hüseyin meclis-i şer‘-i hatîrde Keçeciler’de sâkin Ayak Berberi Süleyman b. Hüseyin mahzarında işbu meclis-i şer‘-i şerîfe hâzır olan Ali nâm zenciyi esir pazarında bundan akdem bana abd-i memlûkü olmak üzere yüz dört guruşa ba‘de’l-müzâyede bey‘ ve yüz dört guruşu yedimden ahz eyledikden sonra ben dahi mezbûr Ali’yi yine işbu meclisde hâzır Börekçi Ali nâm kimesneye yüz elli guruş semen-i makbûza bey‘ ve teslîm etmiş idim. Şimdi mezbûr Zenci Ali hürrü’l-asl olduğunu alâ-vechi’ş-şöhret ve’t-tevâtür isbât ve sebîli tahliye olunmağla mezbûr Börekçi Ali semen-i mezkûr ile bana rücû‘ etmekle ben dahi işbu mezbûr Berber Süleyman’a rücû‘ ve medfû‘um olan yüz dört guruşu istirdâd ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı mezkûr yüz dört guruşun edâsıyla mezbûr Berber Süleyman şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 4 Rebî‘ülevvel sene 1180.