İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 268 Hüküm no: 277 Orijinal metin no: [124-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yıkılmış olan Yarım Han’ın yangına dayanıklı bir şekilde yeniden inşa olunması Keşf-i Yarım Han Ma‘rûz, Alaca Hamam kurbünde Şişeciler Hanı karşısında vâki‘ Yarım Han demekle ma‘rûf olup bir tarafdan el-Hâc Ali Ağa ve bir tarafdan Tuğrâkeş Mehmed Emin Efendi menzilleri ve bir tarafdan merkūm Mehmed Emin Efendi’nin harem bahçesi ve bir tarafdan tarîk-i âm ile mahdûd yedi odalı hanın fevkānîsinde kârgîr tonozlu beş oda münhedim olup etrâf duvarlarını kârgîr binâya mübâşeret etdikleri bundan akdem rü’yet olunmuş idi. Hâlâ mutasarrıfı kādıasker-i esbak merhûm Abdurrahim Efendizâde müderrisîn-i kirâmdan arzuhâl eden Mehmed Reşid Efendi iltimâsıyla vârid olan fermân-ı âlîlerine imtisâlen kıbel-i [şer‘-i] şerîfden Ali Efendi irsâl olunup ol dahi izzetlü Yeniçeri Ağası tarafından ta‘yîn olunan Yazıcı Bekir Efendi ve mi‘mâr hulefâsıyla mahâll-i mezkûra varıp tekrâr mu‘âyene eylediklerinde ke’l-evvel binâya iktidârı olmamağla alâ-hâlihi terk olursa tahtında olan kapı üstü ve simidçi ve ma‘cûncu ve terlikçi dükkânları matar sebebiyle mutazarrır olacağı müte‘ayyin olmağla zikr olunan odaların etrâf duvarlarını kârgîr ve kirpi saçak ve üzeri ahşabdan kiremid pûşîde ile kârgîr sûretde binâya müsâ‘ade buyrulması istid‘âsında oldukları civârında sâkin olanların İmam-ı mahâlle İbrahim Efendi ve Müezzin Mehmed Efendi ve ahâlîsinden el-Hâc Mustafa ve Ali ve Leblebici Ali Çelebi ve Kahveci Kasım ve Sâ‘atçi İbrahim Çelebi ve Berber Mehmed Çelebi ve Simidçi Hüseyin Beşe, Berber Abdullah nâm kimesneler mahâll-i mezkûr sûret-i mezkûrda binâ olunur ise harîkden masûn olup etrâfına zarârı yokdur deyü haber ve bu sûrete rızâ dâde olduklarını gelip inhâ eylediği ma‘lûm-ı devletleri buyruldukda emr ü fermân hazret-i men-lehü’l-emrindir. Fî 5 Rebî‘ülevvel sene 1180