İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 270 Hüküm no: 281 Orijinal metin no: [125-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemiciler Yiğitbaşılığı’na Abdullah’ın tayin olunması Gemiciler Yiğitbaşılığı Ma‘rûz, Sâbıkā Gemiciler Yiğitbaşısı es-Seyyid Abdullah’ın arzuhâliyle Gümrük Emîni Ağa kullarının i‘lâmında tafsîl olunduğu üzere an-aslin yiğitbaşılık babası üzerinde olup ba‘dehû mahlûlünden büyük karındaşı es-Seyyid Süleyman’a tevcîh, ba‘dehû mezbûr Süleyman gemiciler kethüdâsı olup yiğitbaşılık hâlâ yiğitbaşı olan el-Hâc Ahmed’e tevcîh olunup ba‘dehû nâ-marzî hareketine binâen üzerinden ref‘ ve Mehmed Çavuş nâm kimesneye tevcîh ve mezbûr Mehmed Çavuş vefât etmekle sâhib-i arzuhâl es-Seyyid Abdullah’a tevcîh olunmuş iken mezbûr el-Hâc Ahmed sâhib-i evvel ve kesîrü’l-iyâlim deyü istirhâm ve kendüye tevcîh etdirmekle bundan akdem Kapan-ı dakīk tüccârı ve rüesâsı meclis-i şer‘-i şerîfe gelip mezbûr es-Seyyid Abdullah’ın ehliyetini ihbâr ile yine kendüye tevcîh olunmasın iltimâs ve istid‘â etmişler idi. Lâkin mezbûr Hacı Ahmed’e fakīrü’l-hâl ve kesîrü’l-iyâldir deyü merhameten tevcîh olunup ve ref‘ini mûceb bir hâli dahi zâhir olmamağla istid‘âlarını i‘lâm husûsu taraf-ı âlîlerinden bi’l-istîzân te’hîr olunmuş idi. Şimdi reisler kethüdâsı ile ashâb-ı süflîden es-Seyyid el-Hâc Osman b. İbrahim, es-Seyyid el-Hâc Ahmed [126] ve es-Seyyid el-Hâc Mehmed ve Gedik el-Hâc Mustafa ve Düğmeci el-Hâc Bekir Çarşambaoğlu el-Hâc İbrahim ve Zeytinci el-Hâc Süleyman ve Keresteci el-Hâc Mustafa ve Arab Hasan ve rüesâdan Çalık Mehmed ve Hasan ve Osman ve Kahır Ali ve Kalyoncu Hacı Ahmed ve Özlü Hasan tekrâr meclis-i şer‘-i şerîfe gelip mezbûr el-Hâc Ahmed hilâf-ı şer‘-i şerîf gemicileri tekdîr ve ta‘cîzden hâlî olmayıp ve işbu yedimizde âhar arzuhâle derkenâr olunan sûret-i fermân-ı âlîşân mantûkunca bu def‘a Gürcistan seferine Canik tarafından memûr olan asâkiri imrâr için gemiler isticârına ta‘yîn olunmağla tama‘-ı hâmından nâşî ashâb-ı sefâini tecrîm ve tağrîm ve hizmet-i lâzımesinde adem-i ihtimâm ile umûr-ı mühimmenin ta‘tîline bâ‘is olacak hâlâta cesâret etdiğinden Seddülbahr kal‘asına vaz‘ olunmağla hizmet-i lâzımesi mu‘attala kaldığından mâ‘adâ mezbûr Hacı Ahmed’den bi’l-külliye emniyetimiz meslûb olduğundan mezbûrun ref‘inden gemiciler yiğitbaşılığı yine mezbûr Seyyid Abdullah’a tevcîh buyrulmasını istid‘â ve iltimâs etmeleriyle mezbûr Seyyid Abdullah dahi hizmet-i lâzımesinde istikāmet ve sadâkat ve bu misillü hâlâtdan mücânebet etmek üzere ta‘ahhüd eylediği huzûr-ı âlîlerine i‘lâm olundu. Fî 7 Rebî‘ülevvel sene 1180.