İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 270 Hüküm no: 280 Orijinal metin no: [125-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador’un kardeşi Semaven aleyhindeki alacak davasında anlaşma sağlanması İbrâ-yı değirmenci der-Südlüce Ma‘rûz, Hâmil-i arzuhâl Asvador v. Spanos meclis-i şer‘-i şerîf-i enverde Ekmekçi Kethüdâsı ve ustaları ma‘rifetleriyle ihzâr etdirdiği Südlüce değirmencisi karındaşı arzuhâlde mezkûr Semaven ile terâfu‘larında Südlüce’de vâki‘ değirmende mevcûd olan âlâtdan hisse-i ma‘lûmemi yetmiş yedi ve yetmiş sekiz senelerinde yüz elli guruşa karındaşım merkūm Semaven’e icâr, ol dahi kabûl ve iki sene isti‘mâl etmekle seneteyn-i mezkûreteynde lâzım gelen üç yüz guruş icâreyi hâlâ merkūmdan taleb ederim deyü da‘vâ, ol dahi cevâbında müdde‘î-i merkūmun âlât-ı mezkûreden hisse-i ma‘lûmesini vech-i meşrûh üzere isti‘mâl ve isticâr ve cihet-i mezkûreden üç yüz guruş deyni olduğu ikrâr, lâkin elli guruşunu destgâhdarım olan işbu meclis-i hâzır Kazer yediyle teslîm ve bâkī iki yüz elli guruşunu Ayvansaray Değirmeni’nde ta‘dâd ve tamâmen teslîm eyledim deyü def‘ini beyandan izhâr-ı acz etmekle beynlerine muslihûn tavassut etmekle müdde‘î-i merkūm Asvador da‘vâ-i mezkûresinde karındaşı merkūm Semaven ile yüz elli guruş bedel-i makbûz mukābelesinde sulh olup ve ziyâde yüz elli guruş icâreye müte‘allıka âmme-i da‘vâdan karındaşı merkūm Semaven’in zimmetini ibrâ-i küllî ile ibrâ ve iskāt eylediğinde, ol dahi bedel-i mezkûr mutâlebesinden müdde‘î-i merkūm Asvador’un kezâlik zimmetini ibrâ ve iskāt ve her biri âharın ibrâsını kabûl ve kat‘-ı nizâ‘ eyledikleri tescîl olunup bi’l-iltimâs huzûr-ı âlîlerine i‘lâm olundu. Fî 5 Rebî‘ülevvel sene 1180.