İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 272 Hüküm no: 284 Orijinal metin no: [126-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraçishak Vakfı mütevellisi Mehmed Said Efendi’nin alacağını tecil etmesi Sarrâcishak Vakfı’nın mâl-ı mevkūfundan 1476 guruş hüküm Ma‘rûz, Mahmiye-i İslambol’da nezâret-i dâ‘îlerinde olan evkāfdan Sarrâcishak Vakfı’nın hâlâ mütevellîsi olan mevâlî-i izâmdan merhûm Sadeddin Efendi’nin oğlu müderrisîn-i kirâmdan Mehmed Said Efendi tarafından husûs-ı âti’z-zikrde vekâleti müsbite vekîli es-Seyyid Feyzullah b. Abdurrahman meclis-i şer‘-i hatîrde mezbûr Mehmed Said Efendi’nin umûr-ı vakf-ı mezkûru rü’yete bundan akdem bin yüz yetmiş senesi Muharremi’nden yetmiş dokuz gāyetine gelince kāimmakāmı ve yine nezâret-i dâ‘îlerinde olan evkāfdan Sivrikoz [Seferikoz] Vakfı’nın mütevellîsi olan muhâsebe-i mahkeme küttâbından İsmail Efendi b. Mahmud ile terâfu‘larında mezbûr İsmail Efendi müvekkilim mezbûrun mütevellîsi olduğu Sarrâcishak Vakfı’na kāimmakāmlığı zamânında yedinde olan vakf-ı mezkûrun nukūdundan bin dört yüz yetmiş altı guruşunu kendi mütevellîsi olduğu mârrü’z-zikr Sivrikoz Vakfı umûruna sarfla istihlâk edip zimmetinde deyni oldukdan sonra onu on bir hesâbı üzere sekiz senede her sene yüz kırk yedişer buçuk guruşdan deyn-i mezkûr için devr-i şer‘î ile üzerine ilzâm-ı ribh edip sekiz senede müctemi‘ olan bin yüz seksen guruşu kezâlik umûruna sarfla istihlâk ve Sivrikoz Vakfı muhâsebesi masrafına idhâl edip ve hattâ asl-ı mâl-ı mezkûr için sinîn-i mezkûrede hesâb-ı mezkûr üzere ilzâm-ı ribh ve istihlâk eylediğini ikrâr ve işhâd dahi etmekle asl-ı mâl-ı mezkûr bin yüz yetmiş altı guruş ile ribh-i mezkûr bin yüz seksen guruş ki cem‘an iki bin altı yüz elli altı guruşu işbu yedimde olan fetvâ-yı şerîfe mantûkunca taleb ederim deyü bir kıt‘a fetvâ-yı şerîfe ibrâzıyla da‘vâ ve fetvâ-yı şerîfeye nazar olundukda “bir vakf-ı nukūdun mütevellîsi Zeyd ol vakfın mukaddemâ kāimmakāmı olan Amr’dan sen nukūd-ı merkūmeden şu kadar akçeyi birkaç seneden beri mu‘âmele-i şer‘iyye ile vakıf için istirbâh ve ribh nâmına şu kadar akçeyi ahz ve bi-gayrı hakkın kendi masârıfına sarfla istihlâk edip hattâ vech-i muharrer üzere ikrâr dahi etmişdin deyü da‘vâ ve Amr bi’l-külliye inkâr eylese Zeyd Amr’ın ikrâr-ı meşrûhuna ikāmet-i beyyine edicek ribh-i mezbûru vakıf için Amr’a tazmîne kādir olur” [127] buyrulmağla mezbûr İsmail Efendi gıbbe’l-istintâk cevâbında zikr olunan Sarrâcishak Vakfı’ndan asl-ı mâl olan bin dört yüz yetmiş altı guruşu mütevellîsi olduğu Sivrikoz Vakfı umûruna sarfla istihlâk ve deyni olduğunu ikrâr lâkin sekiz senede her sene ilzâm-ı ribh edip ol mikdâr ribhi dahi istihlâk ve ikrârını ve Sivrikoz Vakfı’na masraf kaydetdirdiğini inkâr etmekle vekîl-i mezbûr İsmail Efendi’nin ikrâr-ı meşrûhunu isbât esnâsında beynlerine Müslimîn tavassut edip nef‘an li’l-vakfeyn bi-tarîkı’s-sulh ribh-i mezkûr bin yüz seksen guruşdan mezbûr İsmail Efendi’nin sekiz senede ber-mûceb-i defter-i muhâsebe Sarrâcishak Vakfı umûruna malından sarf eyledim deyü iddi‘â eylediği sekiz yüz on guruşu fürû-nihâde olunup ribh-i bâkī üç yüz yetmiş guruş da‘vâsından vekîl-i mezbûr fâriğ oldukda mezbûr İsmail Efendi dahi râzı olup ribh-i mezkûra müte‘allıka da‘vâdan ahadühümâ âharın zimmetini ibrâ etmekle mezbûr İsmail Efendi’nin ikrârı mûcebince asl-ı mâldan deyni olan bin dört yüz yetmiş altı guruşun edâsıyla mezbûr İsmail Efendi ilzâm olundukdan sonra hâlâ edâya kudretim yokdur deyü istimhâl etmeğin vekîl-i mezbûr dahi târîh-i i‘lâmdan iki ay tamâmına dek imhâl eyledikde ol dahi iki aya dek asl-ı mâl-ı mezkûru tamâmen edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 8 Rebî‘ülevvel sene 1180.