İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 273 Hüküm no: 285 Orijinal metin no: [127-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalinci Hüseyin’in nizamlarına aykırı hareketlerde bulunmayacağına dair taahhütte bulunması Na‘alcı esnâfından ihrâç Ma‘rûz, Ashâb-ı arzuhâlden mahmiye-i İslambol’da na‘linci esnâfının kethüdâları Mustafa ve yiğitbaşıları Hasan meclis-i şer‘-i hatîrde Alaca Hamam kurbünde arzuhâlde mezkûr Na‘linci Hüseyin b. Hasan’dan kendi hâlinde olmayıp beynimizde mu‘teber nizâm-ı kadîmimiz mugāyiri hareket edip ihtilâlimize bâ‘is olmağla bundan akdem bi’d-defa‘ât tenbîh eylediğimizde mütenebbih olmayıp ısrâr etmekle içimizden ihrâc olunmasını iltimâs ederiz deyü teşekkî ve esnâf-ı mezkûreden es-Seyyid Mehmed ve el-Hâc Mehmed ve diğer es-Seyyid Mehmed ve Ahmed Çelebi ve diğer es-Seyyid Mehmed ve Ahmed Beşe ve Abdullah Beşe ve Çauş Süleyman ve İsmail Çelebi ve Osman ve es-Seyyid Ahmed ve Mustafa ve Mehmed ve Veli Beşe ve el-Hâc İbrahim ve İbrahim Beşe ve diğer es-Seyyid Mehmed nâm kimesnelerden hakīkat-i hâl vech-i meşrûh üzere olduğunu ihbâr etmeleriyle mezbûr Hüseyin dahi fî-mâ-ba‘d kendi hâlinde olup nizâmlarının mugāyiri hareket etmemek üzere ta‘ahhüd ve eğer bir dahi ol misillü hareketde olur ise te’dîben esnâf-ı mezkûreden ihrâc olunmağa râzı oldukda esnâf-ı mezkûre dahi şikâyetlerini te’hîr edip bu minvâl üzere kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 7 Rebî‘ülevvel sene 1180.